سواح ** 2 *** في رثاء أخي سيف الدين

في رثاء أخي سيف الدين
==========================


Sawaah
Registered User
Posts: 212
(8/21/03 1:53 am)
Reply في رثاء أخي سيف الدين
--------------------------------------------------------------------------------

بسم الله الرحمن الرحيم

نعي ألـــيم

في فجر يوم الإثنين الأغر، في هذا اليوم الذي ترفع فيه الأعمال إلى الله سبحانه وتعالى، صعدت إلى السماء الروح الطاهرة الذكية، روح الأخ والصديق الودود (سيف الدين)، جاء إلى كسلا قبل هذا اليوم بأيام قليلة تحمله رياح الشوق إلى أبويه وإلينا نحن إخوانه وأهله وإلى كسلا التي لها عنده معزة خاصة، فانتزع نفسه عنوة من زحمة العمل بالخرطوم ليشارك الأهل فرحة عيد الفداء، فكان فداء لهم في حادث حركة مشؤوم في طريق القربة كسلا بعد أن أفضى ما في جوفه من لهفة وشوق ظل حبيساً في جوفه من مدد طويلة تجاه أهله وأحبابه، كان حنوناً عطوفاً علينا جميعاً جميلاً في كل شئ، لذلك كان كل شئ في حياته استثنائي منذ مولده وحتى وفاته (يرحمه الله)، كان هادئاً، باسماً، حازماً، كريماً، شهماً، طيباً بشوشاً، يحمل البسمة عنواناً أين ما حل ، ينساب في حنايا كل من يلتقي به ويتخلل أعماقه كالماء في الجسد عندما تدقدق أحشاء العطشان، تحس بأنك تعرفه منذ زمن بعيد ، لذا كان يوم رثاؤه يوماً حافلاً بالأحزان ، أتتنا الوفود من كل أرجاء السودان لتبكي رحيله الذي كان فاجعةً مؤلمة لكل من عرفه.
عايشته وأنا اخاه الأصغر بفارق سنين قليلة، تقاسمنا الفرح والحزن سوياً، تزاملنا في مراحل الدراسة فكبرنا سوياً، كانت حياتنا واحدة تنفصل في جسدين، حتى في ترحالنا كنا متلازمين، بل حتى زواجنا كان في يوم واحد ، ولا عجب أن يطلق علينا أهلنا لقب التوأمان – إلا أنه رحل من دوني وترك لي عذاباتي وزمالة روحه كخاطر المساء تقلق مضجعي كل ليلة.
أدعو معي ، أن يرحمه الله و يتغمده بواسع رحمته ومغفرته، ويبعثه مع الصديقين والشهداء ويلهمنا الصبر وحسن العزاء – وإنا لله وإنا إليه راجعون

في رثاء الأخ سيف

آه يا سيف .. آه يا رائع .. يا ريتنا نصدّق إنك فعلاً مُتَ
وماتت فينا البسمة الحلوة الطيبة … وكت ما فُتَ
وسكت الصوت الكان يطربنا .. وياما حكيت لنا بيهو وقلتَ
كنت تقول الدنيا نعيمها وخيرها وظلها زايل ….
ورغم الصابك منها يوم ما لنتَ
كأنك عارف إنو أيامك فيها قليلة .. وآخر الخطوة الفيها أكملتَ
كنت الوالد وكنت الأم … وكنت الكل في الكل …
وكنت توزّع بين الناس نفحاتك وين ما كنتَ
******************
آآآهـ .. يا سيف .. لو الموت كان فيهو خيار .. كنا إخترنا تعيش لنا إنتَ
وكنا فديناك بي أرواحنا … لأنك كنت الأجمل فينا .. وإنت الأطيب كنتَ
بكاك القاصي .. بكاك الداني .. بكاك فريق بي حالو وأمة ..
لأنك في جواهم عشتَ
جميع أحبابك كانوا هناك .. بى دعواتهم بى صلواتهم ..
فقدوا أفراحهم .. ما شلتها إنت معاك من يوم ما رحتَ
*************
آآآهـ لو تعرف حال أوشين من بعدك كيف
راجياك بالشوق زي كل صباح .. كما عودتها وأتعودتَ
وحال أبواتك .. آآآهـ من حالهم… حش الحزن أحشاءهم حش …
ما غمضت لحظة أجفانهم من يوم ما رحلتَ
وآآهـ لو تعرف حالنا وراك يا سيف .. ونحن اخوانك
عذبنا وراك القدر الشالك .. وشلّ أعماقنا الفيها سكنت
نتلمس صورتك في أشياءك … نتحرق شوق فاقدين أنفاسك
أريج نسماتك .. كريم إنسانك .. وكل صفاتً بيها أسعدت
إذا أتلومنا في حقك .. سماح يا سيف … وعارفنك دوام نفسك كريمة حليمة .. كنت غفور وكم سامحت
سائلين الكريم يجمعنا بيك في جنة الرضوان ….
ويغفر ليك بحق أعمالك الطيبة .. فيما أسررت أو أعلنت

seed alcarro
Registered User
Posts: 149
(8/21/03 5:41)
Reply Re: في رثاء أخي سيف الدين
--------------------------------------------------------------------------------
إنا لله وانا اليه راجعون البركة فيكم يا سواح

ana ZaitOona
Registered User
Posts: 41
(8/21/03 5:56)
Reply Re: في رثاء أخي سيف الدين
--------------------------------------------------------------------------------
اللهم ابدله دارا خيرا من داره وأهلا خيرا من أهله وزوجا خيرا من زوجه
اللهم اغفر له وارحمه.
البركه فيكم

boco120
Registered User
Posts: 318
(8/21/03 7:04)
Reply Re: في رثاء أخي سيف الدين
--------------------------------------------------------------------------------
الاخ سواح
نسأل الله له الرحمة والمغفرة ولكم حسن العزاء و والله كلام جميل نابع من الفلب وسلمت عزيزى من كل أدى
بوكو

Sam7a
Moderator
Posts: 843
(8/21/03 7:20)
Reply
ezSupporter
إنا لله وإنا إليه راجعون
--------------------------------------------------------------------------------
نسأل الله أن يرحمه و يتغمده بواسع رحمته ومغفرته... ويبعثه مع الصديقين والشهداء

إنا لله وإنا إليه راجعون



sanaric
Moderator
Posts: 874
(8/21/03 7:53)
Reply
ezSupporter

Re: إنا لله وإنا إليه راجعون
--------------------------------------------------------------------------------
نسال الله ان يتغمده بوافر رحمته ومغفرته وأن يبدله دارا خيرا من داره وأهلا خيرا من أهله وزوجا خيرا من زوجه

والبركة فيكم يا سواح




fannan lakin zahjan
Registered User
Posts: 60
(8/21/03 9:06)
Reply Re: إنا لله وإنا إليه راجعون
--------------------------------------------------------------------------------
ربنا يرحمك ويغفر ليك ياسيف , ويصبر اسرتك علي فقدها العظيم

wad abrof
Registered User
Posts: 13
(8/21/03 23:36)
Reply Re: إنا لله وإنا إليه راجعون
--------------------------------------------------------------------------------
نسال الله انا يتغمده بواسع رحمته وان يجعله من الصديقين والشهداء اللهم امــيـــــــــــــــــــــــــــــــــــــــــــــــــــن
الاخ سواح
مثل هذه الاخوه لا تموت يموت الجسد وتظل الروح موجوده فى داخلنا
وانا لله وانا اليه راجعون

Gilany
ezOP
Posts: 420
(8/22/03 11:52)
Reply
ezSupporter

Re: إنا لله وإنا إليه راجعون
--------------------------------------------------------------------------------

البركة فيكم
وتقطعت قلوبنا يا سواح بهذه المناحة المعبرة الصادقة. لقد خلدت اخاك بهذه القطعة الادبية الي الابد
رحمه الله وتغمده برحمته
عيش الدنيا ان كان يحلى وان كان مرة الزين ما بدوم والزول بموت فد مره

ranoya
Moderator
Posts: 723
(8/22/03 21:13)
Reply
Re: إنا لله وإنا إليه راجعون
--------------------------------------------------------------------------------
rabana yiskono fasee7 ganatoh ma3 al sidiqeen wal shohada2 alahuma ameen. wo inshalah al baraka feekom.

Sawaah
Registered User
Posts: 213
(8/23/03 7:51)
Reply Re: إنا لله وإنا إليه راجعون
--------------------------------------------------------------------------------
أشكركم جميعاً أحبتي الكرام ... على تعازيكم
وربنا يدينا العمل الصالح في هذه الفانية
وإنا لله وإنا إليه راجعون

Gilany
ezOP
Posts: 428
(8/27/03 11:30 am)
Reply
ezSupporter

Re: في رثاء أخي سيف الدين
--------------------------------------------------------------------------------

يا سواح علي قلبك صعب تتحمل الاتراح
وسيف الدين اخوك من كسلا ودع راح
ونحن معاك ... شهيق ... ودموع
وفوق قاعدين علي وجه القدر ارواح
وليل الغربه في المكتوم ... وما عارفين
جفاف الطين ... ونهر النيل توجه وين
وجوع اطفالنا والمحروم مع المسكين
ومنتظرين .... ملاك الموت
وكان بكتب في حشانا هموم...
ولسع هجرة الطين الصبح مظلوم
وقلب الام دوام مكلوم
غياب القمره .... نص الليل .. تهد الحيل
مع الزنديه والحكام سبونا عديل
ولسع موسم الهجرات شمال وغرب
شرق وجنوب وحتى الطين ونهر النيل
بعد سفرك دا حال البلد يا سيف...
ولسع نحن في الهجرات وحر الصيف
ولسع في المواني صفوف وفوق القيف
ولسا بعاد... مع الطير المهاجر جاد
لا وطن ضمانا ... ولا لقينا بلاد
رحيلنا معاك يكون احسن ... وكمل الزاد
ونهر النيل عشان أوشين كمان هاجر مع نخله
يقابل القاش بدون ميعاد

جيلاني


عيش الدنيا ان كان يحلى وان كان مرة الزين ما بدوم والزول بموت فد مره

Edited by: Gilany at: 8/27/03 1:39 pm

soma
Moderator
Posts: 149
(8/27/03 4:48 pm)
Reply *** السيف رحل ***
--------------------------------------------------------------------------------


السيف رحل ..
نزل الدمع كيفن هطل
دمعا جمر ادمى المقل
قطع حشاى سيف اليزل
يا سيف شرارك فى الجبل
كتم النفس شتت شمل
رحلت بسيمتك زى زحل
كيفن اطولك و ليك اصل
راحت رويحتك فى عجل
مولايا صبرك لينا حل
جوه القلوب السيف شتل
كنز الجدود ضى القبل
سواح بكاك وما محتمل
نثرك حروف لو ليك تصل
خلد رثاك دمعو النزل
الرحمه ليك وصالح العمل

سواح قطعت احشائى بمرثيتك ..وادميت قلبى ..
الرحمه لى سيف الشهيد ..
والصبر ليك ولى كل الاهل .. ولنا جميعا
سيف ما مات .. سيف شهيد .. وفى جنان الخلد باذن الله ..
صادق الدعاء له بالرحمه الواسعه ..وجنات الخلد ..باذن الله


Edited by: Gilany at: 8/27/03 6:40 pm

Sawaah
Registered User
Posts: 227
(8/28/03 0:53)
Reply Re: *** السيف رحل ***
--------------------------------------------------------------------------------
الأخ والصديق والعم الكريم جيلاني ، والأخت الفاضلة سوما ، لكم التحية لخالصة ولكم الود الجزيل ، فقد رثيتم كما لم أرثي الأخ سيف الدين، فإنه قد حدث من الرزء العظيم بوفاة سيف الدين ما إلى الله جل وعز فيه المفزع والمرجع، وفيه عليه المستعان ، وإن لله وإنا إليه راجعون، إتباعاً لأمر الله وإعتصاماً بطاعته، وتسليماً لنازل قضائه، ورجاءً لما وعد الصابرين من صلواته ورحمته وهداه، فقد كان سيف سبق إلى القلوب عند بداهة الخبر ، من اللوعة وإطلاع الفجيعة ، ما كنا نخاف إحباطه من الأجر ، لولا ما تدراكنا الله به من الذكر لما وعد من اهل الصبر، فنسأل الله أن يرأب هذه الثلمة، ويسد هذه الخلة بأمه وأبيه أولاً ، وبنا أخوته ثانية وأن يعظّم مثوبتنا ويحسن عقابنا

Cherymax
Registered User
Posts: 127
(9/1/03 0:41)
Reply albaraka feekom sawah
--------------------------------------------------------------------------------
إنا لله و إنا إليه راجعون

أخى سواح عظم الله أجركم و احسن عزائكم وانعم اخيكم الفقيد الجنة مع الصدقين و الشهداء إنشاء الله

ادعوا لموتنا جميعاإخوتي اقل ما يمكن فعله لعزيز غاب

Sawaah
Registered User
Posts: 240
(9/2/03 9:19)
Reply Re: albaraka feekom sawah
--------------------------------------------------------------------------------

هذه مشاركة من الأخ الأصغر ، سامي في رثاء فقيد الأسرة العزيز سيف الدين
في رثاء الأخ سيف الدين
قبل الخريف
شالت عيونا ضباب كثيف
ستف مآقينا الدمع
نزلت غيوم الحزن صيف
ظلل ربيعنا سواد مريع
لوّن حياتنا ظلام مخيف
ما كان دة يوم
يومو الرحل
زي التقول راكبلو طيف
فجأة انتقل
لا سمعنا صوتو ولا حفيف
لو كان سعل
كان قلنا سيف
لكنو من يومو الوصل
عايش معانا كأنو ضيف
لا روينا من حنو الهطل
لا شبعنا من زوقو اللطيف
لا نمنا في ضلو الضليل
لا ارتحنا في قلبو الرهيف
لامن رحل
خلانا نجري نقول أقيف
لكنو فات....
خلانا للنوح والنزيف
ما لم من دنيتنا شي
زي نيتو سافر زول نضيف
ما خلي لينا سوي أوشين
أهداها لينا وسابنا سيف
خلانا لي دنيا الخبل
وسافر لأنو إنسان عفيف
***
ما كان شبه دنيتنا دى
خلانا سافر فات بعيد
ما كان يضيق من ضيق إيديه
كان زول قليلي قنوع شديد
ماهماه في الدنيا الكتير
قدر البجيه ما بقول أزيد
وما بنسي كلماتو المعاي
فوق رزقك آ بتقدر تزيد
ما دنيا شن داير تسو
تختاها في الآخر أكيد
لي بكرة ما تشيل أي هم
وأعقلها مهما كت وحيد
ما بنفع إن صريت وشيك
وأحسن لك أنت تعيش سعيد
لكنو فات
ما كان أكون بدلك أنا
شان تبقي بين الناس حكيم
بي نضمك اللامع سنا
شان تبقي لي أوشين رحيم
ترويها بالحن والهنا
تبقالنا كلنا ضل وغيم
بي بسمة تمسح للعنا
لكن دوام الحال محال
ما كنت أمبارح هنا
آه ...
يا ريتني لو أقدر أكون بدلك أنا
لكين ....
إتهنأ أنت هناك سعيد
في الجنة عشك انبني
خليها دنيتنا أم صديد
عيشتاً وراك مبشتنة
تلقاك في قصر مشيد
تتهني بي اجمل مني
خلينا نحن نعيش عبيد
للدنيا والمال والجنا
إتهني يا أجمل شهيد
وادعولنا الله يلمنا

سامي حمزة _ الأحد 31/8/2003

fannan lakin zahjan
Registered User
Posts: 74
(9/2/03 11:17)
Reply Re: albaraka feekom sawah
--------------------------------------------------------------------------------
ياالللللللللللللللللللللللللللللللللللللللللللللللللللللللللللللللللللللللللللللللللللللللللللللللللله
أخوك خطيييييييييييييييييييييييييييييير ياسواح , والله لولا أحزاننا معكم ,ولولا القصيدة مناحة لصفقنا بدلاَ أن نبكي , جد فقدكم عظيم وجلل , وفعلا أخوك قدر يعبر بكلللللللللللللل أحاسيسو , وأظنو أخوك سامي مابكي , دا ماكلام زول بكي وفك عبرتو , دا كلام جميييييييييييييييييييييييييل , حزيييييييييييييييين , ربنا يتقبل أخوكم قبولاَ حسناَ ويسكنه فسيح جناته مع الصديقين والشهداء , اللهم لانحرمنا أجره ولا تفتنا بعده , واللهم صبر أهله وذويه وكل من أحب سيف الدين ورءاه يمشي أو رءاه بين سطور مناحات اخوانه عليه , آميييييييييييييييييييييييييييين

Sawaah
Registered User
Posts: 241
(9/3/03 1:10)
Reply Re: albaraka feekom sawah
--------------------------------------------------------------------------------

أخي فنان ، هذا معنى أن يكون لك أخ وليس ككل اخ ، كان فعلاً ضيف على هذه الدنيا بقناعته الكبيرة وكأنه كان يعلم ان خطواته في هذه الدنيا قد نفذت وكان يعد في زاد الرحيل منذ أيامه الأولى بالدنيا ، لذا كان فقده عظيم وجلل لأنه لم يترك لنا فراغ في حياتنا وإلا ملأه شهامة ورجولة ، وطيبة وحنيّة ، كان لا يترك أحداً يحس بغيابه فهو كان دائم التواصل مع كل من يعرف وأينما ذهبت يقال لك كان معنا اليوم أو امس - فمثل هذا الرجل تحث بفراغ مكانته عندما يغيب عنك ، خاصة وأن غيابه هذه المرة بغير عودة - له الرحمة والمغفرة