الشاعرة وطنية -16- أمشي..

أمشي..

--------------------------------------------------------------------------------
-.-
أصلو الليل ماشافلو منام
من يوم أحلامك مرقت ماشية
لاصلينا اللُّقيا معاك
لاصلواتك قدلت جايّة
مااتوضينا يقينك فيك
اتيممت الشك..جوايا
ماتحتار في البِربط بينا
شيل الشوق والفكرة معايا
أبدا الريد من زولاً رادك
غير مايشوف لي دربو نهاية
واصل فيك..ومشى احساسك
عاشك شهقة في كل رواية
فصولك..شوق وسؤال ممدود
جوابك شلتو معايَّ حكاية
مامليت أحكيك للقمرة
وانت تزيد في البعد أذايا
أنا بيساسق ليلي..نهاري
وانت الليل لبستو عباية
شلت احلامي الفاتت بدري
شلت شروق أحلامي الجاية.



.
_
___
______
_________
______
____
_
.


وهل محتاج أديك يقيني؟
وانت الشك أهديتو هوايا
ممكن تسأل برضو..القمرة
عن أحلامك انت معايا
بدري سؤالك منّي ..بيفرِق
أسي سؤالك..سببو..أذايا
ماأديتك ليل الغربة..
أناأديتك ريد جوّايا
ماسكنتك بلد الهم
أنا سكنتك جوّة رِضايا
قلبي مسامحك وأنت بتعرف..
قلبي موالف في دنيايا
كل مايوم أكلّم طِيبتو..
ليه بتزيدي..عليّ..شقايا
أريت القسوة تزورك مرّة
تقسى على الأحلام الجاية.
________________
____________
_________
____
__
_
.
_
__
____
________
____________
_______________

-...-


أمشي ياحنيّة أمشي
أمشي لي قلبي ورفيقو
كم بشيل من يومي دمعو
وكم بخفّف عنّو ..ضيقو
شوفي بعد الغيبة كيف
سايق القسوة ف..طريقو
امشي ياحنيّة ليهو
طفِّي في الأشواق حريقو
أبقى عادل في قليبك
وأبقى أسأل مين صديقو
ياني متأكّد..جوابك..
ياني.. أسبابو وسريقو
ماقصدو يتعب لي قليبك
أو يسبِّب..ليهو....ضيقو

أمشي ياحنية برضو
حومي في مُرسال بريدو
أمشي ياحنية عندو
أمشي للزول البريدو
يوم قفلت عليهو ..قلبك
ساقت الأشواق ..وريدو
كنت في دنياك لاهي
لاهي عن أحوال نديدو
ليه مُجافي وفي سلامو
خوفي لو بتخاصمو..ايدو
أصلو مازيّك تجافي
زول تسالم فيهو ريدو
ده النخل قالد سماهو
وفي السلام ..فدَّع..جريدو
وأيه يعني لو يشتاق سلامك
وفيها أيه لو كان تعيدو
عارفو قلبك..مافي..منّو..
وقلبو انت براك وحيدو
فيها أيه لو شخص عادي
شاف هواك أملو وجديدو
انت بس أسأل قليبك..
مين حبيبو..ومين هو..سيدو..
مين بقضي الشوق في حزنو
ويوم تطِل ..ببقالو..عيدو
مين بشوف أفراحو..ضحكك
لو تغيب الهم..يزيدو
وحياة هواك تسأل هواك
مين بسمِّي هواك..شهيدو

أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

2008
-------
http://www.al-nafitha.com/vb/showthread.php?t=6658