يامسجون بين قلبك وقلبي
--------------------------------------------------------------------------------
يا مسجون بين قلبك وقلبي
وبين الشوق والفيك بصارع
سر هواك غناهو زماني
سرك وين دساهو الشارع؟
يا مسجون بين قلبك وتحلف
انو هواك من بعض هوايا
وغيم عينيك من غيمي بمطر
هل سائلتا الشوق جوايا
عن احلام مسجونة وتحلم
عن عينيك لو صدقو معايا
بفتح ليك من صدر العتمة
باب الروح واسقيكا هنايا
وين اللهفة الكان بتجيبك
لينا زمان وتدس في ايدك
نبض الشوق واحساس الالفة
الفيها زمان بتدسدس ريدك
يا مسجون جوانا وساكن
لو بس تعرف كيف بنريدك
كنت مليت الدنيا اماني
وهمس الريد غناهو وريدك
وين اللهفة و وينو حنانك
يوم ما كنت براك تدينا
نبض الشوق الطالع وبفضح
سر الريدة الفيك حنينة
ما جيناكا برانا وصدفة
كنت براك من جوة تجينا
زي الضحكة حنينة بتطلع
وزي الالفة الفينا دفينة
عبدالله وداعه الامين
09.08.2006
Cardiff
------------
http://www.al-nafitha.com/vb/showthread.php?t=3870
Subscribe to:
Post Comments (Atom)
No comments:
Post a Comment