الزبير باشا - 2- علي الهواء مباشرة نمشات في خدود الجكس ــ (1)ــ

علي الهواء مباشرة نمشات في خدود الجكس ــ (1)ــ --------------------------------------------------------------------------------
أزمة الجكس .. وإنعكاساتها علي عزوف الشباب عن الزواج وأثر (مقدر الظروف) علي جمال وجه الجكس والبايركس وإزالة حب الشباب

آنساتي .. .سيداتي .. وسادتي أرحب بكم علي الهواء مباشرة
وأهلاَ بكم في حلقة جديدة من برنامجكم
(نمشات .. في خدود الجكس)


دعوني أولاً أرحب معي في الأستديو بالبروفسير/ الكلاكلة صنقعت ، أستاذ البكائيات وعلم البوحولوجي بجامعة أثينا / عميد كلية آد في الفؤاد بجامعة وادي شعير سابقا

وسيكون معنا علي الهواء مباشرة عبر (قمر الزمان) جارتنا .. ومن محلية
(الحكومة دقست)
السيد/ مستشار العريس لشؤون التفصيل


ومن إستديوهاتنا بـ ولاية (حليلو درّاج الولية) الدكتورة/ سارة بت ستة تسعة آل خمسة جرّاحة التجميل الشهيرةأخصائية شد الوجه
(حتي لو كان زي أم فت فت)
وجرّاحة أنسجة الوجنات والنونات الإصطناعية. الدكتورة/ سارة علم علي رأسه نار ولكن لمن لا يعرفوها نقول كان موضوع رسالة الدكتوراة الخاصة بها هو أثر بصيلات شعر الساعدين علي حجم المسامات في ساعد الفتاة والعلاقة الجينية للبايركس المشعرات في الأيدي مع فصيلة الشمبانزي .. كما تتولي حالياً رئيس مجلس إدارة
(جمعية محاربة أحمر قدوم)
لأنو في واحدات عويرات بلحسو الروج .. وتدعو الجمعية للعودة الي وشم الشفة
(أسود قدوم)


كذلك معنا وكيل عريف/ بوكو من شرطة النظام العام ... وبسط الأمن سواء بالدخان أو السوائل ، والجواب يكفيكم عنوانو

أعزائي المشاهدين في انتظار تلقي محادثاتكم ومشاركاتكم علي هواتف وفاكسات البرنامج التى لن تظهر قط أمامكم علي الشاشة ... وكان ظهرت زاتو ما حتلقوا خط ، وكان لقيتو خط نحنا خاتين ليكم البت العويرة بتاعة (سوداتل) ديك .. وكلو مرة حتقول ليكم جميع الدوائر مشغولة حاولوا مرة أخري.
الحل؟ الحل تقعدو تعاينو لينا منططين عيونكم المزردات ديل .. وتسمعونا نحنا بنقول في شنو .. نبراكم كدا بس .. شفتو .. نقة .. نقة .. وعلي فكرة برضو البرنامج البعد برنامجي دا برضو نقة ... ممكن نعمل ليكم فاصل بي مدحة .. ولا مدحتين .. نسوي شنو .. أهو كل خمس عواطلية لبسو لينا جلاليب لون زينب زي بعض .. وكل واحد ماسك ليهو مايك وقاعدين يتلولحو ... ذات اليمين .. وذات الشمال .. أها شفتو .. نخليهم يتلولحو كدي لمن نزغلل بيكم .. أُمال بتاعين النضارات والعدسات اللاصقة ديل ياكلو عيش من وين؟ ما تقولوا لي تنسيق برامج ولجنة نصوص .. ووين قطاع الدراما والكوميديا .. والكلام الفارغ بتاعكم دا.. العاجبو عاجبو والما عاجبو يمشي يشتري دش........ولاّ يشرب موية القاش .. ويحلّي بموية القرض. شوف بالله .. قاعدين كيف .. والله لكن حننتوني (بلا محلبية) عشان كدة ممكن تراسلونا علي البريد الإلكتروني ده
hotmail@yahoo.com

نخش في موضوع الحلقة ونتوجه بالسؤال الأول مباشرة للبروفسير/ الكلاكلة
لماذا يعزف الشباب عن الزواج؟ .. لماذا لا يعزفون كمنجات بدلاً عن ذلك؟
لماذا .. ولماذا .. ولماذا؟ .. لماذا الهجر يا كُـلـكُل؟
الكلاكلة: إنتا يا الزبير .. ياأخوي .. اولاً والله خليني أقول ليك إنها هزُلت.
الناعمنو التلفزيون دا بقي كل من هبّ ودبّ يجي يصنقر لينا ويتحكر كدي في الشاشة .. وينق.. ينق.. ينق .. طول النهار .. وكمان خاتي ليهو معاهو أربعة (لباري)
كل واحد يمط في الكلام .. لكن معليش .. زي ما قالت السُـــرة بت التاية:
(يموت حمار في رزق كلب)
الزبير: .. حاسب علي ألفاظك أخي الكريم .. وقدم المؤاخذة .. مع إنك غير مؤاخذ آخر زمن والله .. زي أمثالك بقوا يتحكموا في إرث وذوق وجماليات الأمة وقضاياها المحورية.. لكن معليش .. واصل
المهم... نرجع لموضوعنا .. وبعدين نشوف التلفزيون الما عندو دليل دا وخاتيكم لينا دا .. الواحد فيكم عامل زي شيطان الكوشة ... ينوني .. ينوني .. والله عندكم زول قديم خلاص .. وما بتجيبوهو إلا في نشرة نص الليل بتاعة الأخبار .. أنا والله خايف يوم يموت لينا علي الهواء مباشرة .. ويلحق طلال المداح .. تري داك قالوا عليهو شهيد الفن .. دا ما عارف يقول عليهو شهيد شنو .. شهيد البلاتو ياربي .. ولا شهيد الكلاكيت؟

نرجع للبنات البايرات ديل
إنتا ياالزبير .. بتنظر للموضوع دا من ياتو زاوية؟
الزبير: الحقيقة أنا بنظر ليهن من زاوية البرهانية الجنب السوق الشعبي.

الكلاكلة: ليك حق ..
تعال هنا .. بتتكلم كيف إنتا؟.. عندك أنا مثلا .. ساكن في أثينا قصاد منجرة (فيدياس)
ومن بلكونتي بشوف إزميلو .. بالاضافة لي اني شايف الإغريقيات الشقروات ... الواحدة زي المهرة .. دي حالتي أنا .. شوفي ضعيف .. يا الله المعاينين كيف؟
وفوق هذا وذاك بجيني الشي الفلاني من ال
spam
في بريدي الإلكتروني .. وما داير أكلمك عن ال
Junk mail
بجيب لي شنو؟
ولاّ الـ
ADULTS
ديك وعمايلم.. ربنا يجازيهم إن شاء الله

تقول لي اجي أعرس من بناتكم المعشكبات ديل .. الواحد ملفلفة زي قندول عيش الريف ..العيش الريف خلينا نحن (العازفين) ديل ... شوف المورطين ديك .. المتزوجين .. وشوف جهنم العايشين فيها .. إنتا يالزبير .. أنا بسمعك دايماً بتردد عبارة صورة .. خير من ألف كلمة .. أها إنتا والمشكوتين .. أقصد المشاهدين ديل ركزوا معاي في المشهد دا ال بجسد معاناتهم دا .. علي الأقل أحسن من درامتكم التلفزيونية .. الزي وشكم دي؟
الزبير باشا: حاسب علي ألفاظك يا بني آدم .. مالو وشي .. هسة بخش ليك ورشة سارة دي .. وسمكرة ومعجون .. تاني قدر ما تشوفوني إنتا والجكس .. دموعكم تجري .. زي الزارعين ليكم مسيل دموع في محل الغدة الدرقية.


06-08-2005,
--------------

http://www.al-nafitha.com/vb/showthread.php?t=331