غابـة الضرا .. ويا أم در شتات !!
--------------------------------------------------------------------------------
غابة الضرا .. ويا أم در شتات !!!
مدخل: وزي ما إنتو عارفين .. .
ناس " دافنشي " ..
و " فان جوخ " ..
و " مــوزارت " ..
(ونضيف ليهم: " جدي طلق النار ود الكرد" ) ..
الجماعة " المسلطين " ديل..
طبعاً تركوا دُرر لا تقدر بثمن ..
في زماننا الحالي ...
مع إنو لمن عملوا الحاجات دي !!
الواحد فيهم حق ( السندوشتي ) ما كان عندو في الوقت داك ..
( " حق التمباك " وهذه بالنسبة لجدي طلق النار )..
--------------
موزارت المسكين !!
--------------------------------------------------------------------------------
موزارت المسكين ..
هسى الوقت داك كان ألفت ليك مقطوعة وسميتا
" بحبك يا حمار " !!
مـُش كان أكلتا " باسطة " معطونة في " طحنية "؟؟ !!
وإحتسيت " جعـّة " مخلوطة بـ " بقنيـّــة " ؟!!
ومن أشهر الماركات ..
(Donkey Walker) !!
أو
" زُمبـارة بايبــر " !!
---------------------------------
الأخ/ دافنشي !!
--------------------------------------------------------------------------------
أخونا/ دافنشي ..
إنتا ربنا ستر عليك يا " لذيــذ " !!!
وألهمك وسميت اللوحة بتاعتك
الـــ " موناليزا " !!
وكويس إنك ما دقستا لتكال عليك " الركلات "
ومن بعدها اللعنات ..
الى يوم " تبعثون " !!!
لو سميت اللوحة بتاعتك ..
الـ " كوندليزا " !!
----------------------
اللخو/ فان جوخ !! !!
--------------------------------------------------------------------------------
الأخ/ فان جوخ !!
ياخي إنتا بالذات .. هــِناي ..
" هـِناي " شنو ؟!!
ياخ إنتا " بتـِاع " عديل كدا !!
أول حاجة خليني أقول ليك:
إنو كل ما أقرا إسمك دا !!
طوالي يخطر في ذهني إسم
" ود أب جوخ " !!
وود أب جوخ دا " للما عارفين " ..
وبرضو للـ " ما دايرين يعرفو " !!
(إسم طيرة ) " ..
ركزوا و" وفوكسو " علي دي !!
بنجيها تاني !!!
ياخ لكن يا " ود أبو جوخ " ..
إنتا راسم ليك " جزمة " كدا أسكت خليها بس!!
أنا لمت شفتها ..
" قسمتا بي جملة الإيمان " !!
إنو " الجزمة " دي كان لابسا زول
شايل طورية .. و" بيقرع في موية " !!
وفي الـ " بادوبا " !!
وبعد ما جا " ملـّصا " حتى إنتا قمتا رسمتها ..
شفتا كيف يا " جوخو " ..
وبعد دا ويجو ناس " زعيـّط .. ومعيـّط " ..
يقولوا ليك " لاركو " ..
وما عارف " باتا " الـ بقت " ساتا " .
(بعد السودنة ) ..
ويا " سلوى بوتيك " !!
قلبى شـِـن سوّي ؟!!
---------------------------------
اللخو/ جدي طلق النار ود الكرد !!
--------------------------------------------------------------------------------
الأخ/ جدي " طلق النار ود الكرد " !!
إنتا إن شاء الله يوم " سردك " ما يجي !!
تقول لي " كيفن " ؟!!
إنتا " ماك الزبير الـلــِــيلنا " ؟!!
أقولك: " أيـــّـا " .. بالحيل ..
ياني الزبير " هيلكــُم " ..
عـِــلا لكن !!
إسمك ورد في " المقدمة " .. " مخسوس " !!
على سبيل الإستعارة " المقشطية " !!
أي أن الجماعة ديل كانو " مـُقشطين " ..
وبالضمن " إنتا كنتا زيهم " ..
ولكن بعد دا كلو !!
جيتو فى الآخر و بقيتوا ناس ..
ليكم " شأو " عظيم !!
أنا جبتا " طاريك " ..
في المقدمة ..
عشان أصل بيهم في " الخاتمة " الي:
" حبوبتي القعدت في راس المرا " جنب الكعبة .. ..
الحكيت ليكم عنها في " نادي الزهجانين " !!
متذكرنها ؟!!
أوكي ..
كلام زي " روث النحل " ..
-----------------
غطستا وجيت ّ!!
--------------------------------------------------------------------------------
حبوبتي دي عندها " حكم " وأمثال " و " مأثورات " ..
(وخستكات ) كدي كانت لمن تقولا ..
أنا بقول ليها " والله يا حبوبتي ما قاعد أسمع الكلام دا إلا عندك " ..
زي شنو ؟!!
أها إنتو سألتوني ؟!!
زي " قسمتا بي جملة الإيمان " الفوق دي ؟!!
(والنسخة التانية منها: " قسم المولي قاسي" ) ..
ومنه كذلك ..
ما نحن الان بصدده:
مثلا تقول ليك:
فلان في غابة الضرا ..
لا يسمع ..
لا يري " !!
أنا الليلة جيتكم ..
وإكتشفتا أني كنتا " في غابة الضرا " ..
غطست ..
وجيت ..
في بعدك لقيت ..
أمدرمان " كركبت " ..
وراقت ..
وخليل أبراهيم ..
دايس " الأبنص " بتاع الكروزر للــ " صاجة " ..
ويغني:
زاد " هجري " يا أم در أمان ..
طال بعادي ..
وحكم الزمان ...
وناس " أبو طيرة " ...
بي وراهو " في كروزر " تاني ....
ساكنوا و ماشين " مورت " ..
ويغنـّوا:
يا خليل ..
يا خليل ..
" خليلك وين " ؟!!
----------------------------------
ود عازر .. وقناة الجزيرة !!
--------------------------------------------------------------------------------
وفي قناة " الجزيرة " ..
" جميل عازر " ..
قاعد " بالجنبة " زي سواق اللوري " السفنجة " ..
وسأل أحدهم: هل من كلمة يا " مندهش " إثر تداعيات ما حدث؟!! ..
فرد عليه " المندهش ": نعم !! ..
في الحقيقة ..
حكاية ..
تضحـِــك الغنماية ..
" والنعجة مستغربة " !!
إذا كان في سنة " دو " ..
ولاّ " تريس " ما عارف ؟!!
الطيارة ضربت " حمار كلتوم " ..
ست اللبن !!
إلتمسنا لـ " كلتوم " العذر ..
وقلنا ليها " إنتي الوداك جنب القيادة العامة أصلاً شنو "؟!!
" الكرزّر " ديل ..( جمع كروزر ) ..
دحين وقت جن " عانيات " أم درمان ..
كانن لابسات " طاقية الإختفاء " ؟!!
مـُش ربنا ستر !!
الشبكة بتاع " الحجابات " بتاعتم تغطي دارفور الكبري
وأجزاء من كردفان ..
وكويس إنهم ما كانو عاملين " رومـِنــغ " ..
للحجبات عشان " تـــُستقبل " داخل " العاصمة القرنيـة "..
وطلعت " من الشبكة " لحظة دخولهم " شارع العرضة " ..
يا جميل ..
يا عازر ..
بالـ " إختسار " كدا !!
أنا عندي كمية مهولة من:
هل؟!! ...
و كيف ؟!!
و " لماذا؟!! ...
و " أين " ؟!! ..
و " حتي !!!
و " لا " !! ..
و " لن " !! ..
و " لم " !! ..
و " إذا " !! ...
و " ما " !! ...
و " عندما " !!
و " ربما " !! ...
و " حيثما " !! ...
و " إن كان " !! ..
و " قد كان " !! ...
و " الأحري " !! ...
و " الأجدي " !!
و " الأجدر " !! ...
و " الأفضل " !! ...
و " الأنسب " !! ..
و من ؟!!
ثم من ؟!!
ثم من؟!!
( وآخد نفس ) ..
وأجيكم تاني ..
" فابقوا معنا " !!
وش لابس نضارة " يرفرف " ..
( يكنتك ) ..
-----------------------------------
Subscribe to:
Post Comments (Atom)
No comments:
Post a Comment