الزبير باشا -15-الي كوندليزا .. بالعامّية

الي كوندليزا .. بالعامّية

--------------------------------------------------------------------------------


(1)

كوندليزا !!!!!
بــــت رايـــس !!!! ..
بت الـ ( .. ...) يا كوندليزا ..

أصلو ما أظن في زول حصل شافك قبل كدا...
وإنتي بالحالة المزرية دي..
" اللهم خمسمائة ألف شماتة وشماتة " ..

قــُنــقــُليسة !!!
تتذكري آخر مرة لاقيتك في " البالتوك" ؟

مـُش كلمتك؟
وقلتا ليك أعملي معروف؟!!
وكلمي الـ
Donkey _ Shot

بتاعكم دا ..
ما يسمع كلام " رمز فيل " .. الحاقد دا؟!!

مش كلمتك يا بت رايس ؟
وقلتا ليك أنا ..
" وتلتين سكان الكرة الأرضية "
مرات بنحس أنو الـ
Donkey _ Shot

دا زول ساذج لامن نسمع تصريحاتو ..
وشــِن بشبه غير:
" البغلــــة المـُــباريــة الخيـــل " ؟!!

تتذكري لمن قال:
" ناس المعارضة العراقية غشونا كان قالوا لينا لو جيتو العراق العراقيين حيستقبلونا بالورود " ؟!!!

ومتذكرة لامن جاء نازل في حاملة الطيارات؟ ..
وعامل فيها هو الكان سايق الطيارة...
(مع أننا عارفين أنو هو ما ينفع فيها " مـُساعد حلّة " حتي !! )

وقال .. وهو يتبجح:
" أن المهمة في العراق قد أًنجزت "؟؟!! ..

ومتذكرة لامن كان بقول أنو:
" مافي إنسحاب وشيك من العراق "..

" ومافي إنسحاب حتي تحقيق النصر "

(ركزي لي علي النصر دي عشان بنجيها بعدين)

تعالي هنا أقيفي ..
BRB
بتاع شنو؟!!
خليني أتم ليك كلامي ..

إنتي متذكرة هو قبيل أصلاً الدخلكم العراق شنو؟
ما متذكرة؟

ما مشكلة ..
أذكرك ..
هو في كم " كوندو " في العالم ده ..
واحدة بس ..

خلقوها " عينة مجانية " ..
(اللهي إنتي) ..

والله أيام يا زمان ...
دقيتو الدلجة ..
يا أم فلجــــة ..

هسة لو كنتي نعلتي الشيطان ..
وقعدتي قبلك هناك ..
وبعتي فولك المدمس في شارع الجمهورية ..
مش كان أكرم ليك من البهدلة الشفتك فيها أمس دي ..
وعلي الهواء مباشرة ..

مبشتنة ..
وحالتك بالبلاء ..
منططة عيونك ..
وريقك ناشــف ..
وترجفي وغالباك القراية ..

وسريع .. سريع ..
جبتي " العوير " التاني ..
الكان واقف وراك دا ..
عشان يتكلم ..

-------------

(2)

قــُــبال ما أتم ليك ..
كدي هاكي شوفي الزول دا لون وشو بقي عامل كيف ..
" زي مؤخرة القرد " ..

http://www.alquds.co.uk/yesterday/11z30.jpg


[line]





شفتيهو عامل كيف؟ !!
مزنوق..
" زنقة كلب في طاحونة " ..

كدي أسأليهو لي ..
شوفيهو كان حافظ أغنية ...

يا الخليت دميعتي تسيل ..
شايل مني جدي الريل ..
أنا أبكن..

------------------



(3)

WB
جيداً .. جيتي ..

عارفة ..
مع أني أنا عارف أنتي زاتك زولة " طيرة ساكت " ..
لكن برضو .. حأقول ليك ..

أها يا حبة عين أُمك ..
نرجع لي موضوعنا ..
الدخلكم العراق شنوو ؟

قبل كدا عايز أذكرك بي حاجة ..

أنو " الروس " ..
وبي البرد الشديد الكاتلم دا ..
ومع " الإشتراكية " و " الشيوعية " .. بتاعتم دي ..
(سميها زي ما عايزة ) ..
لكن كانو ماسكين لينا بلا ..
اللي هو " انتو " ..اليانكي ديل ..
(علي فكرة جنبي " مديدة حــِــلبة .. أديك شوية)؟!!

ما عايزة ؟؟ !!
أكيد ..
ما بتدوريها ..

أنتو عايزين " اليـيـقود " ..
لكن هيهيات ..

المهم ..
أها كنا قاعدين في أمان الله ..
جانا الزول أب وش منقرط داك من وين ما عارف ..
جورباتشوف ..
وشبك ليك الناس " برسترويكا " .. وما " برسترويكا " ..
وقعدتو تلاوو فيهو فترة ..

لامن جا " سكران ديمة " داك كمان تما الناقصة ..
" يلسن "
وطبعا ما صدقتو..
النهاية السريعة " للسوفيت " .. وبقيتو تتبجحو لينا ..
بأنكم الـ
super power

مع أنكم بعد المُــرة الضقتوها في " فيتنام " ..
بقيتو شغالين لينا أفلام " رامبو " سااااااااااكت
وتشيلو .. وتتخيلو ..
وتجرو علي " هوليود " ..
وتصوروا وتبثو ..
لامن أنتو زاتكم صدقتو انو عندكم " الخزعبلات " ..
المثلتوها دي ..

وتشيل وتهرشو في الناس ..
وتسمو في الناس علي كيفكم ..

محور الشر..
و" عبدة الشيطان"
(هي دي كانت ياتو دول يا ربي؟)
والدول المعتدلة ..
والدول المارقة ..

أول مرة تسمعي كلام زي دا؟!!!!!
تعالي هنا ..
أنتي سمح جابوك وزيرة خارجية كيف؟
[line]
ما تزعلي ..
أنا خليت الحسس بي جلالة قدرو وأهو أنا قاعد بدرس فيك بالمجان ..

آخر مرة لامن كنا مع بعض في المسنجر زعلتي ..
ومشيتي تاني ما ظهرتي أون لاين ..
عشان قلتا ليك
" سمعتا الأمريكانيات بقولوا حبك لشراء الأحذية والشباشب ينبع من رغبة أنك تغطي علي شناتك .. ما عندك حظ والله " عندنا دكتور أسنان شاطر خلاص لكن مات الله يرحمو..
إسمو : عوض دكام
كان شاف ليك طريقة للفلجة بتاعتك المعقداك دي ..

هسة ما فات شيء ..
الهباني عندو قعود قاعد يحتضر ..
كان مات بجيب ليك منو سن تسدي بيها الفلجة دي .. رايك شنو؟

BRB

-------------------

(4)

أها .. وأنتو تغشغشو فينا بي أفلام رامبو ديك ..
وإنتو زاتكم صدقتو الـ فيها ..
ومسترخين تهددو فينا .. شي بالـ " آتاري " ..
وشي بأفلام " الكرتون " ..
وشي بأفلام " الكومبيوتر " ..

قام جوكم طيارتين من وين ما عارف ..
الأولي تنهز ليك البرج الأول من مركز التجارة العالمي العاجبكم دا ..
وأنتو تعاينو ليها نصت نهار ..
قعدتو في الواطة .. فاتحين خشومكم ..
عاملين فيها مذهولين ..
مندهشين..
ما مصدقين ..

أُم ريكا ..
الدولة العظمي ..

ومعاكم " حاجة بنتاغون " ..
وعمكم " إف بي آي "..

وباتريوت..
وصواريخ مغطسنها في البحر ..
جا طاير بي فوق ليها ود أبرق ..
يقوم منها صاروخ " أوتومايكلي " ..
ويرزع ليك " أولاد فوزية "
الراكبين طيارة " مصر للطيران " ويعدمم ليك نفاخ النار..

وتقوم تجيكم طيارة من وين ما عارف برضو ..
تخبط ليكم البرج التاني ..

والمرّة دي شوف عيني ..
قمتو جارين جنس جري ..

تجرو؟
ما قلتو نوبة !!!

بلا " حرب النجــــــوم " ..
بلا " جنزير في النجوم " ..
بلا كلام فارغ معاكـــــم ..

--------------


(5)

وينك؟
قاعدة .. شنو قاعدة؟

ردي .. قولي حاجة ..
إتذكرتي الزول التلـّـب من راس البرج الأول وجا نازل ا لواطة زي المنديل الشايلو الهوا مش؟

شفتي ..
اها حكاية ضرب الأبراج دي حرقت الـ
Donkey shot
شديــــــــــــــــــــــــد

وقام قال للناس ..

" أنتو برضو عندكم حاجات عاجباكم نحن ممكن نضربا "


ووقت قالوا السبب بن لادن وما بن لادن ..
والعرب الأفغان ..

وهو بن لادن دا الصنعو منو؟
مش انتو؟ أيام أفغانستان .. والروس؟

وتيب؟

أها قام زولكم الخنيتة دا ..
(الله أعلم أمو جدعت الجني وخلت التبيعة)


رسل ليهو كم صاروخ كدا في كم حتة ..

وحرك ليك حاملات الطيارات ..
وعاقرات الطيارات ..

و " مواشي البحرية " ..

ورسل ود خالتك داك ..
الكان شغال في محلتك دي الإسمو
" كولـن بايل "
(عدم المؤاخذة يعني .. التقول من قــِلة البامبرز عندكم)


المهم .. رسلو ليك " يكورك بايل " دا ..
لـ " جماعتنا " في الشرق الأوسط ..
وقعدتو تهددو فيهم مرة ..
وتبتزوهم مرة ..

حتي بالضمن كان ..
زولكم التليفة دا ..
لمن " رسل ليهو كم صاروخ لي كم حتة كدا " ..

ضربو لينا مصنع ..
كان بنتج " كافينول للأطفال "

قلتو دا معمل بتاع أسلحة كيميائية ..
ومن يوميها ما سمعتا المرا ديك في الإذاعة ..
البتقول لي التانية ..
سميرة ولدك مالو ؟

والله يا كندو انتا ناس حقارين ..
ونحنا تطير عيشتنا ..

أنتو تضربو لينا مصنع " الكافينول " بتاعنا ..

وأولاد عمكم قبل كدا ..
قالو جو بي طيارة..
عايز يضربو الخرطوم..
ضربو حمار كلتوم ..
ست اللبن ..مع اني ما عارف لي سبب وجيه كدي ..
يخليها حايمة بي حمارتا جنب القيادة العامة يعني

----------------------



(6)

زي ما صنعتو بن لادن ..
و " خيالات مآتــة " كتار في الوطن العربي..

برضو صنعتو صدام ..
وإحتضنتوهو أيام الحرب العراقية الإيرانية ..

وفتحتو ليهو أبوابكم علي مصراعيها ..
وقدمتو ليهو كل عون ممكن ..
وغير ممكن ..

وإتغاضيتو عن " حلبجة " وما جبتو ليها سيرة إلا بعد ما دخل الكويت ..
(مع انو ود الصباح المات داك أقرّ بأنو سرق بترول من حقل " الرميلة " )

الله يستر ..
الكوايتة ديل كانو عاملين فيها انهم بيدعمو مشاريع خيرية في السودان ..
ما يكون سرقو بترول برضو من " الرميلة " بتاعتنا ..
مع أنكم إنتو الإستدرجتو صدام لغزو الكويت ..
وانتي وزيرة خارجية ..
( أو بتمثلي)
أنا ما عايزة احرجك ..
لكن لازم أكيد حتكوني متذكرة وقائع لقاء سفيرتكم في بغداد
مع صدام حسين قبل الغزو ..

لكن والله يا قـــُنقليسة ..
كان تخلو صدام دا قاعد في الكويت ..
المحافظة الـ 19 ولا الخرتومية ..

بلد يجيها غزو ..
أول أتنين يقوموا جارين ..
هم وزير الدفاع .. ووزير الداخلية !!!!!!..

والله فعلاً..
القلب إن طفش ما بنفع الحـُــريش ..

لا وكمان الله يرحمو..
قعد يبكي لينا في الأمم المتحدة ..

زول رمز ..
وراس دولة ..

وقت اصلك جريت ياخ ..
أدي الناس إحساس بالأمل .. وإنفراج الكرب ..
وحثهم علي الثبات .. الإنتا ما لقيتو..

(الثبات دي ركزي عليها حنجيها تاني )

قال " جابر " قال ..
ويني هي " الجـُــبارة " دي ..



المهم ..
صدام طلع من الكويت ..
بعد ما اتلميتو عليهو ..
وجا الحصار وما الحصار ..
والراجل ..
والشعب ..
صامدين ..

وفرق التفتيش المشبوهة ديك ..
والراجل صامد ..

ومناطق حظر الطيران ..
والراجل صامد ..

وكل ما يحرك ليهو " جيب " فيهو أربعة عساكر جنوب البصرة ..
ترسلو ليكم 20 ألف جندي للكويت ..
وتدفعوهم حتي قيمة قزازة موية الصحة الجايبنها من " مونتانا " ..

الكلام دا طبعا كان في عهد الـ
Donkey Shot
الأب

( وكان ممغوص من صدام شديد لسر بينو وبين صدام يعمله سبحانه وتعالي )
الوقت داك " رمز فيل " زول " مراسلة ساكت ..
(من أيام الحرب العراقية الإيرانية)
هاك شوفي الصورة دي ..

أقبلي الفايل دا ..


------------------------------------

(7)

أنا طبعا بحكي ليك لمحات سريعة كدي ..
لغاية ما نجي نشوف أنتو دخلتو العراق كيف ..
وليه ..
وكنتو بتقولوا في شنو ..
وهسة بقيتو تقولو في شنو..

طيب ..
بعد " تحرير الكويت " زي ما بتقولو ..
(مع إنها لسة ما إتحررت)..

كنتو ماسكين لينا في ..

" العراق خطر علي جيرانه " ..

" أسلحة الدمار الشامل العراقية " ..

" إنصياع العراق لقرارات مجلس الأمن والإرادة الدولية والسماح لمفتشي الأسلحة الدوليين بتدميرها "
(قرارات مجلس الأمن دي في إسرائيل ما بتتطبق؟ .. خلاص لفوها !! )
فعلا ..
أنتو التفيتو حولها ..

بعد المغسة المسكتكم في 11/9
(شوفي سخرية الأقدار رقم تلفون فرق الإنقاذ عندكم 911 بقو هم زاتم كايسين الينقذم)


أها .. طبعا بعد داك " جات التمثيلية بتاعتكم في مجلس الأمن ..
وأفلام الكرتون ..
وأنو العراق ممكن يخلي أجهزة الدمار الشامل جاهزة للإستخدام خلال 24 ساعة ..
وجبتو لينا صور أقمار صناعية ..
و " كولن باول باشاكا "
يشيل ويشرح في الصور بالمؤشر بتاعو
(عامل زي سيد درمان كافي الزمان داك في نشرة الأحوال الجوية في تلفزيونا)

ووقت مجلس الأمن نام ليكم في الخط ..
(عشان ما صدق كذبتكم الصدقتوها أنتو )
جيتو انتو معاكم الناس الأصلا زمان رسلو عتاة مجرمهيم لأمريكا ..
وأبدتو الهنود الحمر .. وقعدتو
اللي هم ناس الـ
Donkey shot
وأسلافه ..

أنا الغايزني ..
الأهبل الإسمو " بلير " دا جاري بي ورا بوش في الطالعة والنازلة زي الصبي بتاعو..
وبوق .. بس .. يردد أي حاجة يقولا " التيس " داك ..

قال إمبراطورية لا تغيب عنها الشمس قال ..
(والله الأمير يونس ود الدكيم كان قبل يعرس الملكة فكتوريا أكان خلي ريشكم كوم)

جاييك راجع ..
أتلهي هنا لمن أجيك ..
وكان مرا أمشي " أوف لاين "


-------------------------


(8)


طبعاً لسة قاعدة راجياني .. يا هايفة
مش؟
هاك أقبلي الفايلات دي ..

[line]

" مواشي البحرية " دخلو العراق ..
وبدأوا في ترويع النساء والأطفال ..


http://newsimg.bbc.co.uk/media/image...9945469_08.jpg

http://newsimg.bbc.co.uk/media/image...9945483_15.jpg

[line]



وبعد ما أحتليتو العراق ..
لسة الـ
Donkey shot

مـُصر علي أنه " يجري البحث عن أسحلة الدمار الشامل العراقية "
ومرا أسبوع .. شهر .. شهرين .. سنة ..

وطلعت أكبر كذبة في التاريخ ..

وغيّر لهجتو الي " أن صدام كان دكتاتور "

وأن " أمريكا ستجعل من العراق مثالا للديمقراطية يحتذي به في المنطقة "

ولسة بيردد في عبارة
" لن ننسحب من العراق حتي نحقق النصر هناك " ..


[line]



وهاك أقبلي الفايل دا عشان تشوفي الخطوات الحثيثة الإتخذتوها نحو الديمقراطية في العراق ..

[line]
---------------------

(9)

كدا وريتك كيف وليه دخلتو بغداد؟
صاح؟

علي فكرة يا " قـــُنقليسة " ..
رئيسكم دا فات " مسيلمة الكذاب " ..
بي خمسمية ألف درجة بمقياس " ريختر " ..

إنتي متذكرة " مواشيكم " لمن دخلوا الصومال؟
شفتي الناس ديل ؟!!

الهادّي حيلم التعب ..
والأكــــــــــل الكعب...

خلوكم تقوموا مذعورين كيف؟
قال " إعادة الأمل " قال ..

نفس الشيء في العراق ..
بي عمايلكم " الزي وشك "
ووش الزول الفوق ال في أول البوست دا ..

شيء طبيعي العراقيين يقاوموكم ..
إنتو " جيش إحتلال " ..
أسلحة دمار شامل بتاع شنو ..
وديمقراطية شنو ..

مشكلتكم ما بتستفيدو من عــِــبر التاريخ ..
ولا تجاربكم السابقة ..

مشكلتكم ..
إنو رئيسكم كذاب ..
ومغرور في الفاضي ..
وما قدر يفهم طبيعة الشعوب ..

وشعبكم شعب غائب ..
أو مغيّب ..
هو إنتو فاضين لي من " المطالبة بالإجهاض " ..
والإعتراف بالجنس الثالث ..

مفتكرين نفسكم حتعملوا الدايرنو ..
في أي مكان ..
وأي زمان..
بي منطق القوة ..

وأهو جربتو منطق القوة ..
في أكتر من مرة ..
في أكتر من حتة ..

وفيهم كلهم كانت النتيجة زي المأزق الإنتو فيهو هسة دا ..

مش قلتا ليك زولكم دا ساذج ..
الأسبوع الفات صّرح قال ..
" نحن في العراق .. لا نكسب .. ولا نخسر "

------------------------


(10)

ياخ والله دا كلام مضحك دا ..
ما بتكسبو دي خليها ..
كيف ما بتخسرو؟

إذا فرضنا جدلاً ..
إن الخسائر المادية ..
وتعيينات الجنود ..
وتموينهم وعتادهم ..
دا كلو علي خصماً علي ميزانية وزارة المالية العراقية ..

أرتال جنودكم البموتو كل يوم ديل ..
خسارة ولاّ ما خسارة ..

طيب .. البقنع " الديك " بتاعكم دا منو ؟!!!
ووقت أصلك ما قاعدين تكسبو !!
قاعدين هناك حارسين " الري" ؟

والله يا كوندليزا أمس 11/1/2007
كنتي في " السي إن إن"
مثيرة للشفقة ..
إنتي كنتي مكنوشة كدي ..
وبتناهدي مالك؟!!

والـ
Donkey shot

كان قبلها كان مثير للشفقة أكتر منك؟

ليه؟
أوريك ليه ..
دقايق بس ..

--------------------

(11)


بوش: القوات الأمريكية في العراق تواجه وضعاً كحرب فيتنام
واشنطن، الولايات المتحدة (CNN) -- أقر الرئيس الأمريكي جورج بوش بأن الجنود الأمريكيين قد يواجهون في العراق حالياً وضعاً حرجاً أشبه بما كانت تواجه القوات الأمريكية أثناء حربها في فيتنام في العام 1968.
[line]

وألقى الرئيس الأمريكي في مقابلة مع شبكة ABC التلفزيونية الأمريكية، بمسؤولية الوضع المتفاقم في العراق، على مقاتلي "شبكة تنظيم القاعدة الإرهابي"، الذين "يعتقدون أنهم سيكونوا قادرين طرد الولايات المتحدة
إلى خارج العراق."

[line]


بوش: هزيمتنا بالعراق تهديد لبقاء مصر والسعودية والاردن

[line]

رايس تهدد بمواجهة ايران في العراق وتعتبر ان حكومة المالكي تجاوزت المهلة الممنوحة لها

[line]

وجه الرئيس الامريكي جورج دبليو بوش تحذيرات غير مسبوقة لمصر والسعودية والاردن ودول الخليج من ان هزيمة امريكا في العراق ستحوله الي بؤرة للمتطرفين ما سيشكل تهديدا استراتيجيا لبقائها .
[line]
وجاءت التحذيرات في خطاب بوش الذي كشف فيه عن استراتيجيته الجديدة في العراق، وفي اطار الدعوة الي دعم حكومة المالكي. ولاحظ مراقبون ان هذه المرة الاولي التي ينطق فيها بوش تعبير هزيمة امريكا حيث كان استخدم في خطابه الاخير حول العراق تعبير ان امريكا لا تنتصر في العراق .
[line]

ولاحظ نواب عراقيون ان روح الانكسار ظهرت واضحة في حديث بوش عن العراق لأول مرة.
[line]
وكما كان متوقعا فقد اعلن الرئيس الامريكي عن عزمه ارسال 21 الفا من القوات الاضافية، وهو ما سارع الديمقراطيون الي معارضته والتعهد بمنعه من خلال اغلبيتهم في الكونغرس. وتعهد بوش بوقف ما اسماه الدعم السوري والايراني للهجمات ضد القوات الامريكية.


-----------------------------------------------

--------------------------------------------------------------------------------
(12)

[line]

http://www.alwatan-news.com/data/200...mages/fpg1.jpg
[line]




استراتيجية بوش تفشل في الحصول علي تأييد دولي

رايس تهدد إيران وتعتبر أن حكومة المالكي انتهت صلاحيتها


يا قـُـنقليسة ..
كدي خليكم مع العراق هسي دي ..
الـ
Donkey Shot

بعد ما كان يرعد ويزبد بأن

لا إنسحاب من العراق إلا بعد تحقيق النصر هناك "


هسة بقي يقول:

"لا إنسحاب من العراق بعد تحقيق نجاح "

كدي عايني لي صورتكم دي بس ..
ما مثيرة للشفقة؟

كــُــل ..
كــُل يا خويا ..
رُم عضمك ..

والصومال دا ..
أحسن ليك تختاهو ..

BRB

--------------------

01-12-2007,
http://www.al-nafitha.com/vb/showthread.php?t=4760