الشاعرة هند - 6- خــــاطـــــر

خــــاطـــــر ..

--------------------------------------------------------------------------------
أنا راجياك ..
فى آخر خيط الدنيا الماشه
ولابسه الخوف
الوجع الهدّ أكتاف الدمعة
ومال إتحكر سكن الجوف
الروح الفاتت يوم ما غبتا
ورجعت تانى تصارع الخوف
الهمسة البينا وكانت لوحة
آلوانها إتماصت
حرقة جوف
الذكرى الهبّت نار الريدة
وسكنت فى جواى تطوف
والشوق اللسه معاى ملهوف ..



وأنا راجياك ..
فى آخر ضو النجمة الواقفة
بين القمرة وحد الشوف
الشوق الفجَ
العشق الآصبح جد مجنون
الغنوة الماتت فى جوايا
الطيف الفى الآحلام مسجون
الفرح الساكن فينى إتحتحت
وصار مغبون
الحزن الفرهد مليون لون ..



أنا مذهول القمر
الشال من حزنى شوية
وصار مخطوف
وما أنا راجياك
فى صمت الكون
فى فرحة قلب إنسان محزون
فى حروف الشوق المدّت
إيدها ورسمت فى جواكَ فنون..



أنا راجياك ..
فى فكرة راجع
تملآ الدنيا أفراح وسرور
ماأنا جواك من بدرى وبسأل
كيف الدنيا بلاك تكون ؟؟؟


***********

أنا راجياك ..
فى آخر ممشى الصبر الخوف
ما أنا جواك موجودة وراجية
كلمة تودر منى الخوف
النظرة المن عينيك وهاجة
الآلق البجهر نور الشوف
البسمة الفيها جمال الدنيا
وياما اتكتبت فيها حروف
ما أنا راجياك من بدرى وبسأل
كيف الدنيا بلاك تكون ؟؟

هند محمد

10-17-2007,

------------
http://www.al-nafitha.com/vb/showthread.php?t=6007