الزبير باشا - 6 - من الأرشيف (1) رسالة للرباطابي_أون_لاين

من الأرشيف (1) رسالة للرباطابي_أون_لاين

--------------------------------------------------------------------------------
الاخ/ العزيز الرباطابي_أون_لاين
بعد السلام عليكم ورحمة الله وبركاته ،،
كيف الحال والأحوال في هذه المدة الطويلة التى لم نراك فيها
آمل أن تكون بخير ، كما نحن بحمد تعالي لا تنقصنا سوي رؤياك الغالية.

خالي عايز يكتب ليك جواب ليهو قريب الشهر لكن قال أنا من ما بقيت (أفندي) ولبستا البنطلون والقميص والخنّاقة والجزمة ديل .. بقيت زول ُ(متفلفس) وما قاعد أكتب الكلام ال هو بيقولو وقاعد أعدّل فوقو .. وقال لي (هااا زول أمانة إنتا ماك مغشوش .. القلم ما بزيل بلم) وهسع دي جاب المصحف حلّفني .. وقال أكتب ليك الكلام البقولو زي ماهو أها النكتب لك كلامو والمرة الجاية أنا بكتب لي جواب حقي براي.


الي الأبن البار .. ود أختي المجافي/الرباطابي
سلام ليك من عند الله .. ورحمته تعالي وبركاته
سعلتا ربي يلقاك جوابي دا .. سمين .. وأمين .. مدحفش وليك سنكيت .. ومبسوط من الله ومن الأخوان.

هااازول خبارك؟
تلاتة سنين .. لا خبر .. لا جية؟
أوع يكون (صافحولك) البنية النصرانية أم شعيرات منكشات وعيون خدر المصورة معاك ديك؟ الناعمنو العقد في أم ريكا حاجة ساهلة بالحيل ولو دايرلو مأذون ولا بلح .. ولا كركدي... ولا هُب هُب يضربوهو

رسلنالك جواب بعنوانك ألّييل (ملاية كنتاكي) ، وجانا صادي
أها ماني خابر (ملاياتكم) ديل كيفنهن وقلتا لأخيـكّ دا يشوف ليهو زول يسعلو
يمكن حولتا لي ولاية (بيرقـر) ولا ولاية (نقانق) الله يكفينا شر النقة
الناس هنا كلهم مشتاقين ليك بالحيل .. وبسعلو منك سعُال الضهبان.. وأخبارنا كلها بحكيها ليك في الجواب دا والله
(قفانا_أعوج_بالحيل)
والـ
(مراريا)
هلكتنا هلاك ، الحبوب أليييلت الكينيا بقت ماها نافعة ، والدربات ماها قاضية غرد ، هسع دي شايف جابولنا الحقن هيلات (الزيت) ، والباعوضة بقت لمن تجي ماشك عليك .. تدور تقرصك .. تشوفا ضاااحكة خشما واصل إضنيها .. عارفاك لا بتقدر تكتلا بي يدك .. ولا دواك بسوي لي مراريتا شيء.

نحمد الله
نحمد الله .. حمدا يصل لي عندو

كلي شيء عندنا
الفرح .. والكره .. والطهور .. الغـُــــني .. والزار .. والأكل .. والشراب.. والريقة .. والعطش .. المرض .. والعلاج .. والشين .. والسمح
والسوق داك .. فوقوا كل شي .. حتي لبن الطير المعلب.

علا لكن .. مخير الله
الدنيا بي خاطر .. والحكومة بي دفاترا
ناس .. بي قروشا .. تسوي وتجيب أي حاجة
وناس .. تعاين بي عيونا بس
أكان علي الملاح .. ولاّ العلاج .. أجارك الله .. والله شيتاً ما بتصارف بالذات مشي الحكيم وشراية الدواء .. الأكل داك بس خلو .. يعني يمكن تشوفلك دبارة تنحـّـل مع أي زول .. وبالعدم تعصر المخدة علي بطنك لامن الواطة تصبح.

والله العظيم .. ماك طالبني حليفة .. المسعلة بقت مستصعبة بالحيل .. وناس تموت حسرة .. وناس تعيش مرتاحة
علا نحمد الله ..
نحمد الله
بعد ده كل معظم الناس مستورين .. وقانعين .. وراجين الفرج .. الناعمنو كونو مثلاً يعني نحنا أمة مبشرة بالخير
(الحبيب المصطفي قال: الخير فيني وفوق أمتي لي يوم القيامة)
إن شاء الله .. أمة (الأمجاد) الشايفا دي يكون فوقا خير

علا لكن .. الصبر جبر .. والصابرات روابح.
نحمد الله .
الوليدات الجو ديل .. قـُــلنا يبقو شدراً (يضللونا) .. علا أدونا الشمش

المسعلة بقت مبعزقة بالحيل
تلقالك نفر واحد .. ساكنلو في بيت زي القصر الله ورقبتو
وبي الجيهة التانية تلقي
عشرة .. يسكنو في أوضة..
مساكين ..
برّة إن رقدو الرطوبة .. وجوّة إن دخلو الباعوضة.

نحمد الله
نحمد الله

كدي خليك من جنس الحديث دا .. وتعال النونسك شوية .. ونوريك الحاصل .. كنا دايرنك تكون معانا .. قالو (دار أبوك إن خربت .. شيل لك منها شلية).

البحر طمح .. وكتل الخدار .. والعيشة بقت فوق (ضهر الحمار) .. ألآيام دي البحر مستف لي حدو متمسح من القيف للقيف .. والجروف.. والجزر .. والكرد جت لحقن أمات طه .. وأنا هسع زارع في (المترة) القدامية .. وكانت النقاطة هيلتي .. علا لكن .. دردور نعاجا للكرد .. إتلاهمنلهن كيويجريبا لي .. رقدنو حُـمسكة
وطبعا الوبا كلو بجينا في الخريف

بت عمتك (أم_سترين) جاها السعد بعد ما وصلت الخمسة وخمسين سنة ، والعريس راجل (مزواج) عندو تلاتة حريم و 19 شافع وشافعة ، قال هااا ناس .. عشان ما تقولو أنا جاييكم طمعان فوق قريشات البنية ودهيباتا الورثتن .. أنا والله جيتكم
(عايز أكتر أمة محمد)
عشان (الحرب في الجنوب) عدمت الناس الصبي .. وحينئذ (الفتوات) بقن أكتر من (البطان) وهسع خالتك ست_النفر قالت الله وأعلم يلقي منها جني علا أكان بالطريقة هيلة الهانبيب البقولوها دي ، وبيني وبينك الهانبيب رقدن زي قرع ود العباس
(ألف بي قرش ومتين هوادة)
شي أجب ، وشي أبرسي ، وشي توتال ، علا أنا خايف الشافع يجي راسو (مقودس) بسبب الحنبوكات ديل.


خالتك ست_أبوها ربنا فتح عليها وجاتا راحة الشيب
(وربنا عوضا عن صبرها وشقاها)
في تربية وليدا (الوحيد ومشيحيد) العوض . طبعا هو أكان سافر لي بلاد برة وغتس بالسنين، أها والله جزاه الله خير جا صادي هسع
(سمييييين ومدوعل ..وإتبرم جنس برمة)
ما بتقول دا العوض (النعافة) داك. وهسع دي دهج بيت الجالوص داك كلو رماهو في الواطة ، وبناهو ليها بالمسلح بيت تاني دور حدادي مدادي. والسنة دي ساقا معاهو مشت الحج .. وتشيل وتحكي بي حجتا دي قالت ولدا سفـّـرا بالطيارة الميج .. وقالت لك الشيء الطيارة دي وكت قامت كدي وتسوي في الـ وج .. وج .. وجججججججج .. صوتا شن بشبه بلا
(الطشت الجارنو في الدلجة)
شفتا كيفن .. أها .. جات مبسوطة بالحيل وقالت مسكت في شباك النبي ودعت ليك .. وجابت لك سبحة هيلة (بقس) ومصلاية ياهن ديل راجياتكن متين ما تجي.


أها صاحبك السجمان داك (ود_أب_زهانة) وقعلو فوق جماعة تماسيح كدي من ناس تمبول ودخلو في مقايطة بالـ
ZY
وأدوهو كوم هكر كدي حافلة ودفار وأمجاد ورقشة .. وقالولو .. مخسم بالرصول تتفضلنا في العجلة ..
قوم بيعن جت .. وإشترالو واطة زراعية في
(البقر)
ـ بضم الباء والقاف ـ
القدّامي داك بكان كانوا ناس أبوك زارعين الـ
(أب_سبعين)
أها جو يحفرو في
(المترة)
وبعد ما حفروا زي (راجلين) لقولم
(صخرة)
قام زهج وباع الوطة
في الآخر مشي فتحلو دكان في حتة بقولولا (الربوب) وظنيتو بقي يتمسخر
مع (الفتــو) هناك وبقي يشيل ويديـّـن فوقن لغاية الدكان كسر)
أها هسع دي كلو يوم الصباح .. الصباح بشوفوا مجنصص
(وكارب وسطو)
وواقف في الظلط .. يمرق من الصباح ويجي (عشية) سامع قالوا بقي كايس االمرقة من أول جديد
لي بلاد برة تاني .. هو دحين مرقتو الأولانية (شن عمارو) فيها .. الراعي هيلكم الممسوخ البقولوا (الغالي) متذكرو دحين؟
ولا أذكرك ؟؟ .. عمك (الغالي) الـ وقتين كنتو شفع .. تقيفو في الكبري هنوك جنب
(الجروقة)
وكل ما يجي صادي بالمراح عشية كنتو تقعدو تغنولو:
الخوف ياغالي .. تسرح طوالي
إتذكرتو؟
عمن أول كلمني وقال لي ود أب زهانة دا لابدنو
(يدق الدلجة)
الناعمنو قالو (سرق_قروش_كفيلو) الراجل العجوز .. وجا هابر بيهن ..

(أب_فريل)
العربي سيد اللبن قالو قاعد يكب البنسلين في اللبن عشان ما يخمر الناعمنو قاعد يحوم بيهو مسافات طويلة ، أها جاركم راقد في الإستبالية في (الدرجة) عندو ألم الباطن ، ومتهم (أب_فريل) سيد اللبن بأنو هو سبب العضرة الحصلتلو.

أولة أمس زرنا عمتك (الرتينة) في مستشفي العيون .. أكان لقو عندها موية بيضاء ولا زرقا ما أقولك .. والدكتور قال ليهم لازم (تشلقوها) .. أها أكان سوولا عملية (الشلوقة) بي تلاتة مليون مليون وكيلك الله .. وأمبارح أخيك (أب_كاريق) كان معاهم في البيت .. وحكمة الله .. أنتا دحين متذكر بيت ناس حاج اللمين_خانق_الفروة؟ مش بعيد من بيتم .. أها حلف أخيك قال عمتك الرتينة قاعدة جنبو وقالت شافت (ود_أبرق) الراكي في أريل التلفزيون هيلم.


حبوبتك (الرسالة) مبسوطة منك بالحيل .. وتشكر فوقك ..قالت ليك هديتك مقبولة .. فتيل الريحة وصلني .. إن شاء الله (يريحوك بيهو من عرق العافية) .. والله العظيم قطعت مصاريني بالضحك ..قالت لي (الرباطابي) ولدك رسل لي فتيل الريحة .. ماهو قزار . علبة سمممممحة كدي.. وشدة مو كبيرة .. سعيلي الله أكنتا قايلاها علبة
(بف باف).

جارتكم مرت (الخمجو) جاتنا في القايلة أول أمس .. وسامعا تلكم في أخيك عشان يوصيك تجيب لها توب (المنضرة) ـ بضم الميمي ـ
أها قعدنا نشيل ونسعل .. هااااا ناس توب المنضرة دا شن نفرو
وعرفنا علي أنو إسمو
(توب_المرايا).

أولاد خالتك (الكلس) و (ود_الرضية) ، و (الخمجان) ، سمعتا حديثي ، النوم الكتير البسوو فوقو داك قطعوهو ليهم في راسم ، أها جو ساقوهم ناس الخدمة الوطنية ، وظنيتو ياولدي (الفال_تحت_ المخدة) الناعمنو (الكلس) ودوهو بكان إسمو
(كمل نومك)
في الجزيرة
(ود الرضية)
ودوهو بكان إسمو (نيام نيام) ، و (أب_زنود) ودوهو بكان إسمو
(نيام ليل)
قلتلم أنا أكان بي مرادي .. يجو ناس الخدمة ديل يسوقو ود عمتك الجنو أكل بوش داك ويودوهو (ود_عشانا).


نسيبكم (اب_زنود) مسكين ممسوك في (الحراصة) .. أكان مضيوف وراقد في الديوان.. وكان معاهم حاج الداسوقي (مسكين طبعا هو حلاتو زايدة وعندو السكري) أها ظنيتو عطش نص الليل ، قوم يا أب_زنود ماشي يجيبلو موية من التلاجة ال في الـ (تكل) ـ بضم التاء ـ قامت مرتو تكورك حراااااااااااااااميييييييييييييييييي ، أها قوم يا أب_زنود أرقد للحرامي بي (قرجة) في نص راسو .. ودبللو بوحيدة تانية فوق (صفاقو) الحرامي وقع رررررررررب في الواطة لا حركة ولا كشيشة …. ظنيتو فقهو … هسي شايف أولا أعمامك حايمنلهم بي (كشف ) قالوا دايرين يتورولو محامي. أها سمعتا حديثي؟ في الكواريك وصوت (الدفاس) ـ بضم الدال ـ داك .. حاج الداسوقي الماشين يجيبولو الموية مسكين من شدة الخلعة والخوفة الدخلتو .. هسع راقد في السلاح الطبي قالوا جاتو صدمة سكري.

أها .. يا ود أختي .. أسويلك شنو .. الكهرباء جات .. ساعة ما تمتا .. قطعت تاني .. أكان جا البحر .. يقولولنا الحطب قفل ولا كسر التوربينات .. وأكان البحر نزل .. يقولولنا البحر إنحسر ونزل خلي التوربينات في الصقيعة .. وأضاني ما سديتا قبل يومين سمعتا (المسعول) في التلفزيون قال (التمداد الكهرباوي) مطمئن ..
هسة بتملك في الجواب دا بي
(أم_نويويرة).

أها.. إن شاء الله ربنا يجمعنا في ساعة خير .. وشد حيلك وإنكرب سوي لك عمار يريحك لي جني جناك .. وتقبل تحيات الجميع بدون فرز وخاصة والدك العزيز (أون_لاين) والي اللقاء في الجواب القادم.


خالك المشتاق
المتأمل_مفقوع_المرارة


ــــــــــــــــــــــــــــــــــــــــــــ
هذه الرسالة كانت قد أرسلت عبر النافذة منذ سنوات خلت.. أعدتها الآن بمناسبة
عودة البالتوكي الصديق العزيز/ الرباطابي_أون_لاين للسودان .. وبعد ان امضي
إجازة في ربوع الوطن بين الأهل والأصدقاء تمت خطوبته لإحدي الحسناوات
وأقول له .. العود أحمد .. ربنا يتم ليك علي خير .. وبيت مال وعيال إن شاء
الله ... حيث تغمرنا الفرحة والسعادة هذه الأيام بـ فك أسر الباريركس من
اهل النافذة وقدامي البالتوكيون ... وعقبال الباقين .. وأولهم سنارك و
وروروووووووووووووووووووووووووووووووك

-------------

04-17-2006

http://www.al-nafitha.com/vb/showthread.php?t=2362