دخل الشاعر إحدى غرف البالتوك وسمع صوتها وهي تتحدث لمستمعي الغرفة ، فأهاجه الصوت ،فحكى لصديقه الهمباتي الشاعر كرنكا الحكاية شعراً
=================
المايك كتلنى يا كرنكا
--------------------------------------------------------------------------------
اتطرطش حرفنـا واندمـر فـى اللجِـه
وانزرت عليه الواسعه ضاقـت الفِجـه
دخلت البال لقيت الرايقه جـوه الكِنجـه
تأمر وتنهى قالت أسكتـو خلـو الحِجـه
****
سكته مسافـه ممتثـل الأوامـر طايـع
وجاهو المايق انساب جانا صوتو رفايع
أدوهو الشباب شوطين وبـدل الضايـع
ماأتشَبَعَنا فى صوتـو البهفهـف رايـع
****
قال محسوس شويه وبِشكى من الزِكمـه
زادو حلاوه مرض النزله شوف الحِكمه
تتكسر أنوثـه ولـى الغُـرف مُسَتَلمـه
قط ما سمعته زى صوتك علـى النِعمـه
****
واحشنى انكسر قال ليها وييين يا انتـى
ليك أيـام عديـده زى شهـر مابنتـى
وين بدلتى ريدنا ولـى عهـودك خُنتـى
ليكى موايـق الاخـوان تشيلـى تخُتـى
****
كلنا فى انتظار صوت العصافير نسمـع
وطمعانين نشوف نور الخديـد البسطـع
أحلا كلام وأحلا صـدى يـردد يرجـع
وكتين مسكـت المايـق وجـات تتفـدع
****
قالت نشكر الاخوان جميـع وأبوهانـى
ولى الما بعرفو ضيفنا أبوهانى دا الهبانى
يا واحشنى جنيت أنا كنته قاعده وتانـى
هسى رجعت شان خاطر الجنا الوسطانى
****
قالت باكـر الحِنـه وطقـوس أفراحنـا
وقديم قال المثل العرجه بتصد لى مراحنا
نمسك فى تقاليدنا ونعيش بـى سماحنـا
حَت لو كُنا فى بريطانيا روب ومُلاحَنـا
****
سمحه وراقيه حِشمه ودمهـا الشربـات
صوته رقيق وشالت الكاس على الباقيات
خصصنى الجميل بى أجمـل اللحظـات
الا المايـق المكـروه حرمنـى لِمـات
****
قدر ما أعمل اعدادات واحـاول اجـرب
اتبكم سكـت لـى لقاهـا مـو متـدرب
خجلان من مُحياهـا وكلامـى مسـرب
بكره بكسرو بشرى لى واحـداً اطـرب
-------
وما إن قرأ كرنكا حكاية صديقه ، حتى أرسل له عبر الخيط هذه الأبيات مواسياً
فَالَكْ طَيِّبْ آ الهبانـي وَجْـهَ الخيـر
وذِكرَك في المَحافِل زَاكي كَرْفو عَطِير
أريتو المايق الكتلـك سِلوكـو تِّطيـر
بِى قَدْرْ الرجال جاهل وماهو بصيـر
***
مَبْتِحْتَاجْ كلام بَعـد المَـدَّونْ وسَايـر
ونمك في الغرام معناهو يهدي الحائر
الجرح المِنُوسِر وفي ضلوعك غَايـر
تَعَرْفو الدِيمة لى عُشَّاقا حكمها جايـر
***
المايق النِّجِسْ نَقْـلَ الكـلام بعرفلـو
وضَايق حَـرَّةَ الوَنَّـة اللَهيبـا بِقفلـو
خَاف منك وخاف هَدرَ الكلام يِنْسِفلـو
ما عارفك خَبير فَرْضْ التَّخَاطُبْ ونَفْلو
***
قالونا الكبار في المال أخَيرْ لك تِلْتـو
كان جَار الزمن وبى عينيكا شفتا كتلتو
الكان مُستحيل وُ هَمْ في قليبك شِتلتـو
رَبَّك يَسَّرو ووَجَبَ الشكر في النِلْتـو
=============
ولم يقصر الشاعر المسدار في الدخول فازعاً بالشعر
-------- (شعر / المسدار ) ---------
****
****
ترجمـةْ الإبْتسامَـه الليـلـه مــا بنـقـولا
يا الهبَّاني خُـويْ زولتـك دوام هِـي الأولـى
شالـتْ مايِـك الريـدْ والجميـع فـي الهُـولا
وردَّتْ للسَّـلام بـي صـوره مـا معقـولـه
***
يـا الهبانـي مـا تكـورِك بـدون تأشـيـره
آهاتـك مدوزنـه فيـنـا بايـنـه كتـيـره
حين شفـتَ العيـون أقسمـت إنـو زخيـره
قتْ للنـاس جميـعْ زولـي ابتسامتـو خطيـره
***
والهبَّانـي قـال ساحرْنـي بــي كلمـاتـو
مـن دلَّ العيـون كسَّرنـي بــي بسمـاتـو
أصبحْـتَ الحُـوارْ بنشـد بَتـوقْ بركـاتـو
قال بكتبْ لِي لوحْ وانـا جـوَّه فـي نظراتـو
***
يـا ربـي الكريـم مـن الجـنـون تلفـانـي
من صوتْها الرخيـمْ نيرانـو يـوتْ حارْقانـي
كان بسمتْ يمين أهْبِـرْ وقـول شِـنْ جانـي
مـا جنيـت يميـن ..إلا العيـون آسـرانـي
***
المرض البجيكـي ان شـاء الله لـي أعداكـي
ديل حسدوني فيكـي ومـا أحسُّـو الجَّاكـي
كان دُرْتِ القليب يا (بسْمه) أمسكـي هاكـي
سبحـان الإلــه الأحْكـمِـكْ سـوَّاكـي
***
الهبانـي قـال واحشـنـي مــا خـلانـي
والمسـدار كمـان فـوق العِشِـقْ رازانــي
ودَّ قليبو لنـدن وقـال بِكـوس فـي الجانـي
ورُّوهـو الحرامـي ..كرنـكـا والجيـلانـي
***
والهبانـي جابْلَهـا مـويَـه مـاهـا شـويَّـه
قالْ لَهـا بـي ابْتسامتِـك ..إتِّ أعزمـي لـيَّ
صنقرْ في الوَطهْ وقـال يـا كريـم جـود لـيَّ
حين قرتْ السُّـورْ قـال يـا وجـعْ كُرْعَـيَّ
***
لمّينـا الفـزعْ والـزول بقـولْ يـا مْــرُوَّه
يا شيخنا الفكي .. يا كرنكـا بيـك نِتقـوَّى
جاتْ ضمنَ الفزعْ قالـتْ دا ميـن ميـن هُـوَّ
قـال غطُّونـي وااايْ نيرانـو بقَّـتْ جُــوَّه
***
جابُولـو الفَقِيـرْ مُسـدار مــعَ اللالـوبـه
قـال ربَّ الخلوقْ..هبَّانـي تَمْحَـى كـروبـه
تشفاهـو الضَّحَـى مـن العيـون وحروبَهـا
يصبِح زول نصِيحْ مـا يْسَـوِّي قلـبْ الهُوبـه
=========================
ويعود الهباني ليرد على كلام صديقه الهمباتي كرنكا
يطيب معناكَ يا اليوماتى متباشر بشايراً طييه
يا اب شورتاً تفوق شورة الصغير والشيبـه
دايمه عليـك دلايـل النِعمـه تقـدل هيبـه
حاضر رأى وصافى سريره فيـك لا ريبـه
****
نمـك خفـف السـواهـا فــى المـايـك
خبيراً لـى خفايـا الـروم تطـرز حايـك
بى نضمـاً دُقـاق وأخـر حروفـك لايـك
حناكـاً تقـول سوولـه سلـكـاً شـايـك
****
العاجبنـى فيـك عـارف مكـان الـكـي
وكان عصرونى فـى مكتـل تقـول أحـي
مو من قِل صبُر لكنـو حـاس بـى البـى
مجـارب طعنـة العينيـن وسهـر الغيـى
****
قبلان بالمثـل بـس وينـو تلـت المـال ؟
اتـوارى الظُبـى ضاعـت وراهـو أمـال
بدور أسكن عديل فى غُرفـه جـوه البـال
ان تـاوق رجـع ناديهـو قولـو تـعـال
****
صِبِحِتِ بدرى ختيت فى أب سبيبـاً ساتـرو
شِلتَ معايـه صنـدوق الجهـاز ودفاتـرو
اترجيتـو مايـك الجـن وطالـب خاتـرو
اسمح لى أناضم البى السنيـن كُـت ناتـرو
==========
ثم يرد على المسدار ويشكره على فزعته
صَـح لسانـك اّ المُـسـدار فــزع ملهوفـنـا
دخلـت علينـا بــى نـمـاً بِـبـرد جوفـنـا
دونــو ودون ملاقاتـنـا ان لقيـنـا حتوفـنـا
حديثك شفتـو فـى البـال زى زخيـرة طوفنـا
****
كلام مرصوص عديل زى قَسَـمَ التمانيـه جنيـه
تجـاوب لـى التسـاؤل مــا بتعقـبـك لـيـه
فقيهـاً فـى العِلـم موهـوب خطـيـب ونبـيـه
حيرت بـن حـزم وصـف الكـلام بـى وجيـه
****
شـرح بـن حـزم أيـة الـجـوارى الكُـنـس
قسمـاً بيهـو أقـسـم ربــى مــا بتحَـنـس
قال لـى زاكـى قـول أسطـوب ومـا تحسـس
يا الادمـن بشـوف نـاس مامـا ليـلاً عسعـس
****
جاطـو وفرتقـو الـروم شقـو لــى نُصـيـن
وقـال الدايـر اجينـا يجينـا عــارف ويــن
حـان وكـت الـدَرِس وشَـرِحْ كِتـاب الـديـن
واحد قال دا عارض المُغرب البغلب على التحصين
****
حلفاويـه تكـتـب فــى الرسـايـل سـاهـى
قـالـت نـحـن مظلـومـيـن عـديــل والله
الوطنـى البكـسـر فــى التـلـج ويبـاهـى
بـى خطـاً جميـل طالـب لـو كاسـة شاهـى
****
مسـك المـايـك المـسـدار وقــال تقـريـر
شـارح أيـه فـى القـرأن وســورة النـيـر
قال يـا جماعـه ديـل اخوانـه برضـو نجيـر
نسامـح ونصفـح ان كــان خـانـم التعبـيـر
****
حـان وكـت الـدرس ودرسنـا درسـاً راتـب
مربـوط بـى زمـن محـدود وماهـا مقـالـب
درس تجويـد وتوضيـح لـى مخـارج الطالـب
تصبحو بكره فى امـان الله برضـو انـا طالـب
============
ولكنه يعود مرة أخرى ليتذكر اياما بعيدة وكأني به يريد أن يبعد القراء عن مقصوده في الأبيات الأولى
حِسَكَ ساهـى تقلنـا ورفـع أصواتنـا
يا أب قدماً تقيل ساعة القبايـل جاتنـا
ربك دارى بى الحال استجاب دعواتنـا
لقيت عسوله فى البالتوك وسط أخواتنـا
****
من ما لقيته اتزكرت صـوت سنـارك
وكت بى ابسدر لى نايبو يصرج عارك
خابى وراك بى أبقنفه البكوس لى ودارك
يا نفس الرماد خلاكى لاوى عُصـارك
****
بدور أسأل واقول كيف حالك اّ عسولـه
سائل منك الممهـول وتَلـوى فصولـه
شايله نياقـو تتـردع تنيـن محمولـه
رسايل شوق ودفتر ريد بحكى فصولـه
****
بس مرقت سريـع قبـال تعايـن لـى
وجفلت ضاربه شباك الهويـد والصـى
أصبر وأرجا يا شيخنا اللـزوم الـرى
ماتعاين قريب أكان قريـب فـى أبيـي
===============================
وتدخل مهيرة واصفة زيارة الهباني بأنها مشرفة ،وكأنه قد زار غرفتها المعروفة في البالتوك حيث يكون السمر والنقاش الحر للكثير من القضايا
في البال الكبير شرفــــت يا هبــــــاني
وفي الرووم الصغير الزدتو لينا معاني
طليت ذي قمر ضوي المكان وزمــــان
*********
حاشاك مو بخيل ايــدك قســـم رفعاني
فــــي الجود والكرم زايد كمان تحنـاني
مولاي ليك يزيد من فيضو ايدك تانــي
*********
جاك الدور عقب ما سمعت صوت ابــو هاني
و مـــــو قايــلاك ات زوالي البريدو جينانــي
ومن زمنا طويل انــــا ليـك كــت رجيانــــــــي
*******
جاني شعاع حروف دهش العـيون خلانــــي
اســـارق باشتيـــاق مغذي الكلام همانــــــي
=============
الزبير باشا الذي يتناول الأمور من منظور مغاير ما~ل إلى الفكاهة يشارك بهذه الأبيات
الخبر الأكيد في النت قريتو فـــــي منتــــدي " الرنداق"
خبراً عجيب ومشوّق متل حكايـــة النعمــــة بت وراق
قال " الجاحصولي " الهباني الليلة مرق من " الدقداق"
في البال إتنين إتلمـو " المشتاقـــة " و " المشتــــاق "
فــــي روم " الحســس" جانــي " الباونس" مباغــت
وبي غيرتي من هباني خشيت لكرنكــــا برايفـــــــت
سلام.. هباني شنِ بسو؟ كتب لي أبـداَ أهو قاعد ساكت
هو جا عاني المهرة الـ لقاضي الغرام شكــت "النافت"
شـــاتــــوك يا الزبيــــر وقمرية المايك تشدو تقوقي
وقالت حبــاب أبوهاني وليك هيامي وكل شوقــــي
وللرافعة إيـــــدا بتأمـر يا بنية أهجصــــي وروقي
الليلــــة زارنا أبوالهنا عايزة إنداح وأأدي فروضي
شاتوك لأنك غِرتا من المايك لامن كتبتا الزبير إتلعن واسوقـو
وبسبب حسدك للهبانــــــــي وعسل المايك الكـان بنقط فوقـو
ولامن قلتا شوفو "الهنا" كيف متهني في الروم و حار سوقـو
وإن ما ضُقتا عسل "المهرة" "مولاس" منها منـــاي أضوقــو
" الباونس " والـ "بان" فداك يا "المحسوسة" شاكية من الزكمة
الـ "أندركفر" جيتبـــو ملثـــم وشوت الأدمـــن لي خاتي الحكمـة
أنا لا جيت أسرق ولا غازلـتا وجنيتي بس قلتا أنا كاتلاني البسمة
وشوتيّ متل التقول شالتنــــي من أنفاس المهرة هبوب كالنسمـــة
يا ناس أخير " إتفكفك" الهبانـــي بجــــدارة كســب الجولــــة
فازبست العفاف والحشمة الـ ماها " فاصلة الديـن من الدولـة"
في النافذة بمشي أعمل " لبتـــون" أكان تبرّد نار قلبـي الشولة
ومع الجيلاني " ألف صينيــة " سيد "الحنك السنين" والصولة
لا " حديـــــدة" لا "جالـــــون شكيت ضيق الحالــة لكرنكا
"وداد" عند هباني أب "شرتيت" وأنا حايم وراهـو " كدنكا"
"أبوالقدح" ياربــــــي "يجازفو" لا "عقد جلاد" لا شَبكــــا
ولا عرضة لا قيدومة لا صقرية لاحفلات لا رقيص ولا دبكا
من زولا طــــرق احساســـي دا الجوانــــــي
=============================
وحين دخلت ريم مروي قائلة
الاذن تعشق قبل العين احيانا
بس يا همبانى وصفك روعة حسستنى كانى قاعدة معاكم فى الروم دى يا سيدى سلامتها الف سلامة من الزكام وان كان انا بعجبنى صوتى لما يكون عندى نزلة بس ما بحب الاعراض التانية ( وجع الحلق والحمى والفتور وغيرها) على العموم نحنا فى انتظار تصليح المايك تحياتى لك ولها
رد عليها بهذه الأبيات مع إشارة يفهمها اللبيب كما يقولون
ماشُفتك عشان نورك بهر شال بَصـرى
يا المشتوله فى جوه القلب لـو تـدرى
ما فطيت حديث ست الغرام العـزرى
لكن داسى ريدك وانتى زايده فى هجرى
***
بتظاهر تقيـل خايـف تفـوح قصتنـا
بتمتع بـى هجـرك يـا قمـر حتتنـا
توقيعك جميل زاهـى وغمـر نافذتنـا
يا البهدلتى نـاس وكتلنـى ود خالتنـا
***
بهدلنى العشق فى قلبى سـوا عمايـل
ومشتاقين ديمه لى ليم الفريـع المايـل
كرهته الاجهزه الباقيـه بينـك حايـل
ليمـك بجبـر الخاطـر بكـون smile
===============================
ويرد على مهيرة بقوله
ماك ضهبانه يا ملكـة بنـات البـال
وفيكى مِحِنَه يا السمحه وبعيده منـال
مُناى القاكى بى عينيك تشوفى الحال
ترقصى لى واغنيلك وأشيـل شبـال
***
عامت وحاكت الوزينه فى عومانـه
مالت وانتنت برز الصديـر جبخانـه
كلما جـات تلاقينـا وتفتـو معانـا
اتسلط على مايـق السجـم اسطانـا
***
امرق منو كرهان روحى زاته عشانه
اسخط اسب عديل لى الاجهزه التعبانه
كيفن ياخى تحرمى روحى من انسانه
فيها اتعلقت ضـرب القلـب نيشانـه
=====================
وبمربع يرد على نونو التي مرت قائلة
ننتظر عودتك يا الهباني
و ما تغيب كتير
لكن لقيتك رندوقي عالي المستوي
ماشاء الله موهوب شعرياَ و رندوقياً
موفق انشالله في كل مساعيك
قائلاً
تسلمى يا البتسئلى منى كل ما غبتـه
وتنتظرى الرجوع لو يوم حصل شتته
ما بنحمل غياب من سوح ربوعه البته
لكن الظروف ضغط العمل يـا انتـه
============
ويعود كرنكا بعدما لاحظ الدرر المسكوبة وابيات الترضية فيخاطب الهباني
حكمة
--------------------------------------------------------------------------------
واحدين في غُرَفْ "PAL" بِي كَلْمَتين رَضُّوهِن
وواحدين دُرَرْ الشِعْر في النافذة كَمْ رَصُّوهِـن
نَظَمُوهِن عِقُودْ فُـوقَ الرُفُـوفْ عَرَضُوهِـن
كَانْ الجَّاهْلَـة تََرْضَـىَ تْمُـرْ تَعَايِّـنْ ليهِـن
=============
ويفطن الهباني لما يعنيه كرنكا فيرد عليه
بركه الشُفته حال حظى السجم يا كرنكا
بدورك تمشى لى شيخنا وتحِل الشِبكه
لا بغلبك حديث لا بتدى راسك حكـه
يا مولود عُضام أبعاج حجر لى السِكه
***
بحكيلك حكايتى انا باختصار يا عصام
ومو غابيك شـى حاشـاك ات قِـدام
جيتكم طالب المُهره وسبق لى كـلام
باركتوها لـى وحلفتـو مـا بنضـام
***
عقبان جانى حساب بطلاسمو وسحرو
غيب عقلى بى بخره ومحايه وفِكـرو
مسكنى فى حبال الهوى بريت شِكـرو
هسع عقلى عاد والوادى تَلَبَ صقـرو
=================
No comments:
Post a Comment