أمريكا تنصب المنتخب وتلحس السلف
--------------------------------------------------------------------------------
المقدمـــــــــة
تابعت " كغيرى " من الكائنات التى على وجه البسيطة !!
مراسم حفل " تنصيب " الرئيس الأمريكي المنتخب..
" بركـة ود أب آمنة "!!
غايتو ما عارف:
" تنصيب " دي من:
" نصب ينصب تنصيباً ؟!!
أم من:
" نصب .. ينصب .. نصيبــة ً"!!
على كل حال ..
جورج " بيش " إتلحس !!
وذهب الى مزبلة التاريخ
( مسكينة المزبلة .. والله ما تستاهل) !!
ويبقي كل ما فوق البسيطة..
بسيط !!
=================
التحيـة للنقاشيــن
شايف " النقاشيـن " الأمريكان ما قصـرو " تب " والله !!
وجيـّروا " البيت الأبيض " من بـرّة !!
بــ " جير هوكس " !!
جورج بيش طبعاً كان من نوع " المؤجر السيء " ..
ال ما بحافظ على البيت ..
وكا لـ " لورا " بعلتو ..
دي كمان شمطاء" مبوجنـة " ..
" مسهـّكة " و " ومدهـّكـة " !!
" معولقة " و " مبشتنة " !!
كانت خاتا " لداياتا " جنب الحيطة " البرانيـّة " ..
بتاعة المكتب البيضاوي !!
لغاية ما خلت الحيطة " مسوّدة " !!
وكانت لامن تجى " تعوس " !!
" بتفزع " للحطب في حديقة البيت الأبيض ..
وزى ما بتقول حبوبتى " الله يرحما " !!
ال ما بيعــــــرف !!.
ما يدوهو يغرف !!..
مرة بعلها " مستر/ حمارويه " !!
جاب ليها " شــِبس " ..
(بطاطس مقلية ) ..
قومى يا " لورا " ..
" أفركيها " ..
=============================
ضحك هستيري " أدموسفيري"
ضحكت كثيراً..
" وبهستيريا " !!
لمن شفتا " جورج بوش " الأب!!
جاي ماشي بطريقة غريبة..
والله جا ماشي عامل زي ..
" فـــــّرامة الخـُدرة " !!
ومرة مرة " يتكـل في " الحيزبون ..
" بربارة "..
تبربري !!
هى المسكينة زاتا ما فيها ليهو حيل ..
وماشة على " الحـُركرُك "..
بقوة دفع
" ثاني أكسيد الكربون " !!
غايتو أنا " وعلى سبيل المجاملة البروتوكولية "!!
وفي نفس اللحظة أهديت ليهو أغنية:
ما ليك أمان ..
يا دنيا ..
مافــــــــــي أمـــــــــان !!!
===============================================
الكرسى أب عجلات
القميء " ديك تشيني " !!
جابوا ليك " لازنــّو " على متن الكرسي " أب عجلات " !!
لامن سألوهو :
" كفارة يا خينا " !!
" نعل ما عندك عوجة " !!
قال " عوجة " مافي !!
لكن " المضرّة " حاصلة !!
قال: وهم راحلين من البيت !!
" العتـّالة " أبو يمشو معاهو !!
إضطر " يعتـِل " الكراتين براهو ..
لغاية ما حصل ليهو:
"تمزُق في " الضهر " !!
" أريتو لو بقى غضروف أسفل السلسلة الفقرية " !!
(ما بين عظمة: " العـُـصــعـُص " والتى تليها من أعلي)
=====================================
حوالينـا ولا علينــــــا
كنت في غمرة السعادة !!
أنو طيلة الحفل !!
" عينى ما وقعت " على الإطلاق في:
تلك " التي يئست من المحيض " ..
الضهب " كوندليزا رايس " !!
(وا شماتة أبلة طازة فيك )
========================
ميشيل أوباما !!
يا بت !!
أمبارح أنا كنت:
" مكـّسرُكِ" !!
تشيلى وتوزعى في " المناقير " !!
(قلتى لي أمس كنتى عاملة خدك " سبيل؟!!" )..
" ومنقارك " برضو .. مرات مرات " !!!
ينوبنـى عندك " قرمـة " !!
" كيـةَ " لـ " كوندليزا " !!
سمــح ؟!!
=================
صاحبنا بتاع السجارة الـ " زنوبيا " و هـِنـاية !!
المذيــع الداخلى لامن " نوّه " بمقدم أخونا
( بــُلبــُل ) !!
سيداتى / آنساتى / سادتى ..
بيل كلتنون / ترافقه هيلاري " سلاسي "!!
(متذكرين برنامجو الإنتخابي كان شنو)؟؟!!
الجماهير " داخل /وخارج " مقر الإحتفال !!
ضجت ورجت ..
وصفقت ..
وحيّـته !!
شفتو " الإجهاض " ..
بيعمل شنو؟!!
وبرضو تقول لي:
" الإجهاض " بيقطع الخلفة ؟!!
=================
نجوم الحفل !!
كانتا الزهرات " ساشا " و " مليا !!
تملأهما حيويـة مرحة ..
وتوزعان الإبتسامات !!
لم يكن مرتبكات على الإطلاق !!
رغم ضخامة عدد الحضور..
إن شاء الله يا " ساشا " !!
تقعدى في البيت الأبيض لغاية ما " يكفو ريحتك "..
ويدقو دلوكة صـُــبحيتـــك !!
========================
" الصلاة جامعة "
نجى للزول القعد " يتلو الصلاة " داك !!
( قبل أداء القسم )
ياخ لكن " الصلاة " عند أولاد عمكم " سام " ديل ساهلة بشكل !!
كل المطلوب منك:
" تتكـي " رويســك ..
أو " تسبـّل طرفك " !!
أو كليهما معاً ..
لا " غـُسل !!
ولا " وضوء " !!
ولا " تيمم " !!
وقال ليكم كما نوهو بيتلو في صلاتو..
كأنو قاعد يحكى في قصـة لى " حيسس " !!
يا جيسس: .
ياخ نحنا إرتكبنا خطايا ..
وذنوب كتيرة ..
وزي ما عارف: يا " جيسس " :
نحنا إرتكبنا فظائع!!
ومجازر !!
وقمنا بأعمال بشعة!! ..
وهسة ياخوى:
بالـ " فتيتو " ليك دا كلو !!
وبمناسبة " تنصيب أخونا " بركة " !!
عايزنك تسامحنا!!
وتبارك فينا ..
وتبارك لينا في " أُم ريكــا " !!
كان لى جنس صلاتك دي ..
" مفروض تقيم الليل وأطراف النهار "
=============================
جيمى كارتــر
أخونا جيمى كارتر
( جـِـمــِـــع كــرّار)
" كما كان يحلو لصديقي الأرتري تسميته "
ترافقه " روزالين " !!
بالرغم من فارق السـن !!
إلا أنه بدا بحيوية ونشاط
أكثر من:
جورج بوش الأب
( فرّامــة الخـُدرة )!!
بل: وجورج بوش الإبن ..
( حـِمارويــه ) !!
ال وشو كان زي:
" خطرات القـِرد " !!
(دي لزوم الحـِشمة وكدا يعني)
" خرمج " الدنيا وقعد !!
سلم وأمن دولييـن ..
مجازر..
إقتصاد ..
بطالــة ..
" والى آخره حدث ولا حرج "!!
وكان قاعد " مذهول " في الحفل !!
بشبه إبتسامة " بلهاء "!!
زي ال ما كان مـُصدق إنو فترة ولايته إنتهت ..
بل أعتقد: إنو ما كان مصـُدق حكاية تنصيب:
" بركـة ود أب آمنـة " !!
========================
أغنيـة حماســة
طبعا كان من نجوم الحفل !!
واحدة ترتدي " قلنسـوة " في راسـا
علىشكل " وردة " بالجنبة كدي !!
عند منطقة " تماس " الحاجب !!!
( إحتمال تكون " مسز هاريس " بتاعة كتاب The Flowers of Mrs Harris)
المهم " ذات القلنسوة " دي جات أدت ليها أغنية حماسية .
بمصاحبة الأوركسترا !!
وكلمات الأغنية " حسب ما تخيلت ":
البــِدوركم ..
تراكـُـم !!
حلـّـــق الطير ..
لى غداكم !!
إتباشرو..
بى بلاكم ..
أرِكــزوا ..
" ميشيل" وراكم !!
===================
http://www.al-nafitha.com/vb/showthread.php?t=7339
Monday, March 30, 2009
Subscribe to:
Post Comments (Atom)
No comments:
Post a Comment