أنتَ الفَرَحَ ..
--------------------------------------------------------------------------------
بالله كيف قبلك أنا ..
شلتا الفرح جواى غُنا
وعشتَ الوهم طول السنين
مَديت خطاوى الشوق سكك
ومشيت دروب اللهفة ليل
ضحكت معاى لحظة حنين
ووقفت فى ليل الشجون
أسأل قمر ليلى البعيد
عن طيف بزاور فى الحلم
وملامحو مابتشبه وشييك
وبقيت أفتش للحنان
وانا واقفة فى هجعة سكون
فى سكة كيف ماتودى ليك
وبالله كيف قبلك أنا
شلت القلم أرسم خطوط
وألوان خريف
ورسمتَ كيف قطر الندى
سحر الورد
ولون الورد فى وجنتيك
وبقيت أفتش فى الدروب
عن خطوة ما بتشبه .. مشييك
عن بسمة فى نبض الشفاف
ونظرة حنان ما من عينيك
بالله كيف شلتَ الظنون
ومشيت أفتش للآمان
وانت الآمان لمسة ايديك
إنسان ملآن عزة وولوف
مغروس وسط زمنى العنيد
ولساى بفتش فى العيون
كان ألقىَ ليك فى الناس مثيل
بالله كيف قبلك أنا
عشتَ الصباح
وأصلو الصباح لحظة مجيك
أتوسم الخير البجى
والخير بلاك أملاً .. بعييد
أصلو الفرح لحظة مجيك
وكل الدروب سكة مشييك ..
هند محمد
2007
=======================
http://www.al-nafitha.com/vb/showthread.php?t=5229
Subscribe to:
Post Comments (Atom)
No comments:
Post a Comment