الشاعرة هند - 7- ظــنـــــــــون

ظــنـــــــــون ..

--------------------------------------------------------------------------------
ما قلتَ ليك أنا بيك بكون ..

وما ببقى من غيرك أنا

أنا ليك دوزنت الحروف

شديت كمان وتر الغنا

رسلتَ ليك مطر الغمام

يرسم خطاك ويحضنها

وكتبتَ ليك أشواقى ريد

وصيت دموعى تلحنها

وسرحت فى الغيمات هناك

أتذكر اللقيا الهنا

سبّحتَ لخاطر مجيك

وشتلتَ ازهار المنى ..



ما قلتَ ليك أنا ريدى ليك ..

أشواقه باقية مع السنين

لا الفرقة طَفَت نار هواى

لا الحيرة بدّلت الحنين

أدمنتَ خاطر إنى ليك

مالكنى ريدك مستكين

ما الدمعه من عيني تفّر

والقسوة فى جواك تلين

وما قلتَ ليك أنا ببقى بيك

القمرة فى وسط النجوم

الكون مداهو مدار هواى

غنواتى ليك هى النجوم

واقف براك سيد هواى

ابداً محال ريدك أخون

صّدقنى بكتم فى أساى

واجعنى شيلك للظنون

وما قلت ليك انا بيك بكون

أرجع تعال سيب الظنون ..
************
ما قلتَ ليك أنا شوقى ليك

نيرانه تتحدى الظنون

خلتنى اكتب فى غناى

مسكونة بيك حد الجنون

ما قلتَ ليك انا بيك بكون

أرجع تعال سيب الظنون

ما الفرحة أشعر ريدى فيك

والبهجة ريدك يا حنون ..

*************

معاك تتجدد الاشواق

وأحس ريدتنا موجودة

ومعاك يبقى الفرح دفاق

وأغنيك آحلى أنشودة

عينى من حنان عينيك

زمان من بدرى موعودة

تعال نغنى للافراح

نقول للناس اهى الريدة

سنين آفراحنا لما تمر

محال من تانى تجديدها..

هند محمد


09-30-2007,
--------------
http://www.al-nafitha.com/vb/showthread.php?t=5949