الشاعر الهباني أحد شعراء همباتة النافذة المجيدين ، يتميز بلغته الموغلة في بداوتها ، واسلوبه الرفيع ، وقد تبوأ مكانة عالية ليس بين همباتة النافذة بل بين فرسان هذه الضرب الشعر على مستوى السودان.
-------------
مقبوله الهديه
--------------------------------------------------------------------------------
الراى السديـد السابقـو جـود وكـرم
هيلك يـا سليـل المـك يميـن حـرم
هيلـك تدفـع أبعرضيـن وتعفـا الـدم
وهيلـك فوتـة الوابـل السحابـو رزم
***
بشوفك علـى ضهـر أبسـدر متوهـط
ممهول تفقد العدمـان ومـاك متشطـط
مشتول الجناين الرامى تمـرو مسبـط
بدور أصباهو يا جيلانى عفشى مربـط
***
باكـر بشـد فـوق الهديـه الجـابـه
شيخ جيلانى مخصوص مى ابل جلابـه
أمـو معتلـه ونكاسـه مـى حـلابـه
بصبح بكره غنيان ان وصلـت أم بابـا
***
أبعرضين اكت فى الباجه محجمـو نـاز
طارى ظعينـة الرايقـه أم قرينـاً نـاز
أشهب أكب افـر جنحينـو زى البـاز
خفو يرص متل مكنـه ومعبيـه جـاز
***
خلفت كراعى حنيت لى أم نفايـل دوب
جانى دعاشه ينعش ويفـرح المكـروب
الممشوق قوامو ودابـو لبـس التـوب
منو بقيت قريب والدنيا دابـه غـروب
***
أبعرضين يـوح بحملـو طبـق الحنـه
اتشمشم بخور الكاتلنى شـوق ومحنـه
قال لى ات وصل قتليهو حجـر الحنـه
هادى ارياح حبيبى البى الغـرام كاتلنـا
***
وصلناهو الظريف من راسو لى كرعيهو
ربى حباهو بى خلع الجمـال كاسيهـو
النـور البـوج مـن طلعتـو وخديهـو
يضوى مدينة الناس القصـاد عينيهـو
***
هى محاوله لرد جزء من كرم شيخ العرب الفياض نسئل الله ان يديم عليه النعم
-----------
ويرد عليه شيخ العرب جيلاني مرحبا ويهديه ( أبعرضين ) وهذه عادة شيخ العرب حينما يأتي أحد الهمباتة الجدد فيتم قبوله وإهداؤه جملا حرا يستخدم لاحقا في قصائد الشاعر المعني
يالهباني جيت بيـت الكـرم والجـود
وإقرار النسب في النافذه ليـه حـدود
حققناك خلاس فارسا صحيـح بتقـود
وفي حسابنا المهر ما بندفع بي نقـود
--
بعد الشفته يا الهبانـي شيـل السافـل
ابعرضيـن هديتـك بالزمايـل حافـل
مهيرة النافذه الجابـت قليبـك جافـل
ما بدوهـا لـي زولا هويـن وسافـل
--
انحنا بناتنا بي توب الشـرف هيبـات
جمال الخلقه فوقن وبي النفوس طيبات
الرجل البكفـي مهيرتـه مـا بتفـات
ويالهباني اركز مافـي فيكـه غـلات
--
بشرناك بالنسب وكتين عجمناك عـود
لقيناك اقوي من معدن حديـد موجـود
بي قدح الكرم صاحب ضيوف بتجـود
وفي الحاره ام كماج ياكا النمر والـدود
--
النافـذه يـا الهبـانـي دار أبـطـال
ظلام الهجره وقر فيهـا ستـر الحـال
ما بينا السفيه ما بينـا شيـئ بطـال
وشايلين الوطن بالنافذه فوق البال"Pal"
---------
اما الوطني الشاعر المجنون فيسجل اعتراضا على ما فعل جيلاني دون مشورة
يا جيلاني قولك .. هذا قول مرفـوض
كيف تدي البنية دون راينا المفـروض
ونحن اهل سِتر نحمي الشرف وعروض
بنركز فى اللقاء وفى الشينة ما بنخوض
----------
ويرد الشاعر الهباني على ترحيب جيلاني والهدية
قدر مارف برق برقك خفاهـو وصعـد
وقدر ما أنم وأقول يا أبسم غناى بتجدد
أبعرضين طوى الباجه الفسيحه ممـدد
طارى مطارف اللينه اللهيجه العسجـد
***
ارص مكنة نسيج تسمع وحيح فى سدرو
يرسف بالبطانه ان شاف علوها بحدرو
المربوع قوامـو وديمـه طالـع بـدرو
حرم مالقيت مثيل فاق الكبار والقـدرو
***
ظنى لقيتو فى محلو وكمـان مدهـوش
كرماً خاتى صبنه غِرقنا حـد الشـوش
يقدل فينـا تلبـاً توبـو مـو مفشـوش
يشبع ضيفو كبـده وشيـه لحمـة دوش
***
احتفـل المأصـل جـدو مـك الـدار
بزفافنا ورقـص مداحـو دقـو الطـار
عم نبانـا فـاح فـى كافـة الاقطـار
والنافذاب تهـذ وسلاحـه ولـع نـار
***
يـا ابـداراً تلملـم للمقيـم والــزار
بدورك لى الحسود مقـلام وكيـة نـار
بدورك تنصح الوطنـى وتـدى انـزار
بدورك لى حجا وتبقالـى درقـة جـار
***
نازل فى حماك والفـى حمـاك مابِِِِِِِِهِـم
راقـد علـى ضهـرو وبدوبـى وِانـم
ناجى ومن شرور ناسو المعاهـو سِلـم
ِبَسِكْت منـو حسـاب والعـوازل تِـم
-----------
ويخاطب الوطني قائلا
بترفض كلام شيخ العرب يا الوطنى ؟
بتتجاسر على سيد النحاس أب رطنى
حالاً ان ركب بكسـر رقابكـم بتنـى
عقبان فى الوعد صادق بعيدكم بدنى
---------
ويرد الوطني بهذا المربع
ابوي جيلانى بكسّر للرُقاب وتنيها
وإن قالك نعم دى كلمتو ما بتنّيها
الزول البصل لى يدو ما بلويهـا
واليد التخونو نارن بولـع فيهـا
---------
وعندما قرا الشاعر حساب إشارة الهباني الى اسمه ، يرد بقوله
المشاركة الأصلية كتبت بواسطة الهباني
نازل فى حماك والفى حماك مابِِِِِِِِهِـم
راقد على ضهـرو وبدوبـى وِانـم
ناجى ومن شرور ناسو المعاهو سِلم
ِبَسِكْت منو حساب والعـوازل تِـم
يا ناس تعالـو شوفـو الـزول السجـم
قبل اقطع الرحط قال في ضل نسيبو ينجم
طالب الحما؟ ها زول إت ما عنـدك دم
اسمايل أكان قِبْلَتْ بْك بكرة بالحيل تنـدم
القول السليم نديها للوطني ود عمها لـزم
يا ود جون ياخوي، إت ماك هين وومابنقدر نجارييك، لكن أعي محاولات على قد الحال
--------------------
ويخاطب حساب اسمايل التي دخلت البوست كأول مهيرة
اقتباس
المشاركة الأصلية كتبت بواسطة smile2me
ما شاء الله اباااااااااااااع
يا بت إتقهري، ياتو يوم بناتنا بجن يصفقن للعريس قبال العرس كمان، كلو منك بالجيلاني
من فرحة العرس جات بالصفقة اسمايل
فاكـا شعـرا قـال عـامـلا style
دة الكلام الأعـوج، والحـال المايـل
والتصرف الغلط، الفي بناتنا ما خايـل
أوعي تزعلي يا سمايل الكلام ده بجيب مديح من الهمباتة أصبري ساي (طبعاً نظام تحرير السوق)
------
ويعود الهباني ليرد على ما كتبه الوطني
الأصلية كتبت بواسطة الوطني
ابوي جيلانى بكسّر للرُقاب وتنيها
وإن قالك نعم دى كلمتو ما بتنّيها
الزول البصل لى يدو ما بلويهـا
واليد التخونو نارن بولـع فيهـا
قبيل ساعة طلبت الرايقه عارفو نباهو
مو غابينى ودنمراً نتر فـى خلاهـو
أمرق منها ات خلينى بصفا معاهـو
والفى قسمتى لو طلع النجم بلقاهـو
***
َنظِرتَك ضيقه يا الوطنى وكلام قبليه
السودان بعيش فى ناره دفـع الديـه
أنبذ لى الخلاف والعنصره الجهويـه
ابقا معاى وخلى الباقى كلـو عليـه
-----------
ثم يلتفت إلى حساب ويرد عليه بهذه البيات
--------------------------------------------------------------------------------
اقتباس
المشاركة الأصلية كتبت بواسطة HASSAP
يا بت إتقهري، ياتو يوم بناتنا بجن يصفقن للعريس قبال العرس كمان، كلو منك بالجيلاني
من فرحة العرس جات بالصفقة اسمايل
فاكـا شعـرا قـال عـامـلا style
دة الكلام الأعـوج، والحـال المايـل
والتصرف الغلط، الفي بناتنا ما خايـل
أوعي تزعلي يا سمايل الكلام ده بجيب مديح من الهمباتة أصبري ساي (طبعاً نظام تحرير السوق)
HASSAP
حساب أقيف خلـى البنيـه التفـرح
قدر ما فره خاطر بى حديسك تجرح
قلبى حنين وبى أسهم لحاظه مشـرح
ديسه غزير ومى فاكاهو ابقا مسرح ؟
***
نحمد ربنا الما شافـه بـى عيونـى
سهام براقه من فاطر سنونه أعيونـى
على ست البنات التايها فيهـا متونـى
أصبح ناوى يا حساب أخير تختونـى
***
باكر بركب أبعرضيـن مـع البـواح
على الجاهله أم متوناً أعيت الشُـراح
مانى الاروش أبخيـلاً بجـن قُمـاح
وان الكوع حِما بنلفا المضيق ان صاح
-------------------
ويعود حساب ليخاطب اسمايل التي عادت مرة أخرى وسنقرا ما كتبت في رد حساب
مشاركة الأصلية كتبت بواسطة smile2me
ابوىحساب انا صفقت للشعر الرهيب ده صفقت ليكم كلكم
سامحنى يا بوى انا راجعه اسمع واعاين من وراء المشربيه
:
اسمايل يا بتي كلامـك بالحيـل واضـح
صفقتـك للشِعِـر ماهـا أمـراً فاضـح
وزيرة الحب والأمـل، بلبلنـا الصـادح
أبشـري بالخيـر، وكـل ليـلٍ صابـح
بجيـب المـأذون، وللبتحبيـه بصافـح
*******
مُسامحة يا بتي طيبـة الخصـال والنيـة
عمايلك من تبيتي صحيحـة ميـة الميـة
حاشاك الغلط، ما بتعرفي الدروب الملوية
ما عيـب أكـان وقفـت ورا المشربيـة
حبوباتك اسـاس، بدَسـن فـي القُطيـة
---------
ويعود شيخ العرب للخيط بهذه الردود
يـا ابـداراً تلملـم للمقيـم والـزار
بدورك لى الحسود مقلام وكيـة نـار
بدورك تنصح الوطنى وتـدى انـزار
بدورك لى حجا وتبقالى درقـة جـار
قـــال جـيـلانــي.............
تسلم في حجاي ما يهمـك الفشـار
الوطني انحسم في الحين أخـد إنـذار
حبابك ضيف شرف أن دار وأن ما دار
ونحنا قرارنا في حسم المواقف حـار
قـــال الـهـبـانـي ............
نازل فى حماك والفى حمـاك مابِِِِِِِِهِـم
راقد علـى ضهـرو وبدوبـى وِانـم
ناجى ومن شرور ناسو المعاهو سِلم
ِبَسِكْت منو حسـاب والعـوازل تِـم
قــــال جـيـلآنــي...........
خليك في حماي وانا قلت كلمة خيـر
وما يمسك كلام حساب ولا التنظيـر
القول الصحيح مـا بعقبـه التغييـر
وذي الوطن لسع في القبيله صغيـر
يا الوطني هوى كَتـر الكـلام خليـه
بتتشالق علي الهباني قمته عليـه؟؟
يا وليد بنصحك ما تزيد كلامـك ليـه
والعيب بنكتب قـول الشكـر باريـه
----------
ويرد حساب على عبارة جيلاني
المشاركة الأصلية كتبت بواسطة gilany
حساب والله بقيت هباتي لكن ما ديمقراطي
لووووووووووووووووووووووووول
يا همباتو هوي أقروا الخبـر الآتـي
شيخ العرب أعلـن حسـاب همباتـي
شدوا حيلكم بعـد دة بجيكـم يوماتـي
بس أصبرو شوية يا دوب قاعد أتاتـي
*****
شيخ العـرب كرمـك جانـا عديـل
بكت عيونـا بالفرحـة بللـن مناديـل
شهـادة غاليـة مـن زولا أصـيـل
بَخُتَها رايـة أقراهـا صبـاح وليـل
*****
بس يا شيخ العرب لي معاكـا كـلام
ما شيتاً غلـط بكـره عليهـو أتـلام
عرضنا غالـي وسيفنـا فيهـو قـدام
بنوتنا بندسهن، ما بقولن حتـى سـلام
*****
الديموقراطية العميا إن شاء الله تْطيـر
والبجري وراها عميانا يقع فـي بيـر
ال بِفَرِط في عرضو زولا إضينا عوير
اسمايل بِنَعْقِدْلَهَـا مـا عندنـا تأخيـر
-----------
ويرد الوطني
المشاركة الأصلية كتبت بواسطة الهباني
يا ابداراً تلملـم للمقيـم والـزار
بدورك لى الحسود مقلام وكية نار
بدورك تنصح الوطنى وتدى انزار
بدورك لى حجا وتبقالى درقة جار
بي جيتك بشوف جات المحن تتبارا
ما خلت فريق خربت صُغار وكبارا
غير جز اللسان ما عندي ليك دبارا
أو سفرك مقيد في الحديد لي بـارا
--------
ويختم الهباني هذا الخيط بالرد على الوطني
الأصلية كتبت بواسطة الوطني
بي جيتك بشوف جات المحن تتبارا
ما خلت فريق خربت صُغار وكبارا
غير جز اللسان ما عندي ليك دبارا
أو سفرك مقيد في الحديد لي بـارا
قديم قال المثل الشين ضُرس ورانـى
والما بعرف الصقُر بشويهو يا جيلانى
هيلنا نلم شتات الناس ونرجع تانـى
لى العبادى قال يكفى الجنس سودانى
Subscribe to:
Post Comments (Atom)
No comments:
Post a Comment