إلي الهمبــــاتي الهبــــــاني..
--------------------------------------------------------------------------------
الهباني كيف حالك ؟أول بالتبادي أحمد عوض الكريم أبوسن قال :
جاهلاً سَمْح.. ومشبوك طرفو
الله أدّاهو..يدْفِقْ في الجمال ويغرفو
جَدْى أُمَّات رقاب الفي البطاين شَرْفُو
الأسَف الكتييير ماخْبِرنا جِيهْتُو نَعَرفُو
الراجل كان بشكي عدم الشوفة بعد المرة الأولى ..ونحنا هنا بنشكي قِل الشوفة..دحين بدور اسمع رايك..
جاهلاً فَارِّي سِنُّو وجوز نهودو عوالي
طايع ممتثل أمرو وكلامو الحالي
أدْعَجْ خِلْقَة ضامِر ..ريدو شاغل بالي
طبْعُو نَفُوُر شبيه الريل ..سكونو عوالي
******
يا هباني خُوك مكتول حكايتو حكاية
شاغلة قليبو جاهلة وبالصدود كَاوَاية
مَرَّاتَاً تَجُوُد بي بَسْمًتها الضَّوَاية
وباقي ايامها نافْرة تقضِّي يومها قراية
******
أنا يابْجون غَبِينْتِي غَبِيْنَة
مَمْكُونْ القَلِب ..حكايتي طين وعجينة
فُرْسَانْ الدُّواسْ أنا بَقْرُضُهم في الحِيْنَة
لكن بالقليل يابجون قرضتني ها الوزينة
=============
ويأتي رد الهباني سريعاَ على أمل عودة
أولاً بالتبادى يا عزنا وعز البطانه مشتاقين ونحن زاتنا بنشتكى من قِل شوفتك
والله من قوة حروفك حسيت بى حسسك وربنا يجمع
مرحبتين حباب عز النوافـذ وراسـه
مرحبتين حباب نوره البيقدح ساسـه
مرحبتين حبابـك عِزنـا ونبراسـه
جليس الكابى ديسه ولى النفوس وناسه
نحاول غايتو بعد كده اكان نقدر نفيدك
قَدَرك ياخى محبوبك طبيعتو نفـور
ماخد طبعة الجافل عِنـا أبقرقـور
خارج من نطاق الماده والدستـور
اشبه وشو نور الهلا طبق الـدور
****
رقِد لو الكلام شاشيلـو نمـاً حِلـو
امكن استحى ويرجع عُقالك يحلـو
كُلما تاه دلال استحملو وأصبرلـو
لمن نمشى لى القوقل نخبرو محلو
****
عقبان نفتل الرأى نفدا بـى عينينـا
نرضيهو انبقيت حاسب حسابو علينا
أرقد مطمئن السمحه سالمه وزِينـا
تدخل حوشنا بى النافذه بتتاوق لينا
****
راجع انشاء الله
============================
ويرد عليه عزنا بمربعين
سلامات يا زول يا رائع..بس ياخوي ده لا قوقل لا ياهوووو لا ألتافيستا ما بجيبو خبرو..وبالواضح كمان قافل عليه اللستة (مربوعة ناقصة ههههههههههه)
رقّدت الكلام..شاشيتلو يا هباني
سمَّحت النَّضِم واديتو ضُمَّة معاني
سَوّيتلُو النميم ورَبَقْتً ماااا حلاّني
ودرني النَّفُور وابا ما يَقَبِّلْ تَانِي
******
برَّاق سِنُّو ضَاوِي وفيه بسمة عجيبة
كل مايفِر بِسيمُو قلوبنا ضربة تصيبة
سماحة الجاهلة يا هباني ذاتة غريبة
لكن في النفور فازت على البُريبة
=================
ولما يرى جيلاني رفيقيه
وهما يشكوان لواعج الحب ، يذكرهما بحالته المستعصية
يا ناس انتو قدامكـم مهيـره كوتنـي
بي نار الفراق وسط الجمـر ختتنـي
مقلة عينه بي لحظ السهـام حاشتنـي
كتبت للمحاكـم ارضحـال وشكتنـي
--
كايس رضاكي علي الدرب ساسـاق
مكرب توبي في سرج اب سدر خساق
ابيت الليل قوه بحسب بنات ام سـاق
وقال لي اب سدر لمهيره ما بنسـاق
--
قدر ما قول اقوم القى الحرس قدامي
ما دايـر يـزح او يستمـع لكلامـي
قمر دورين فقدتك في السهر ومنامي
أرجع يا قساي ارحم قليبـي الدامـي
--
حالي الما بسر وصفه البعيد والدانـي
حالا قولـوا كـور الحيـر الهبانـي
ود اب سن كلامك كان بفيـد الفانـي
عقبان تاور الجرح المونوسر وجاني
========================
ويطلب منه عزنا الحل
شيخ جيلاني حِلَّنِي كان يحِلَّك بلّة
حالتي اتدولت سِمْعُوبها ناس عِبْدِلَّه (عبد الاله)
شَيُوم الجاهلة يا جيلاني زاد العِلَّة
صِبْحَتْ روحي في إيديها بس خيط شلّة
******
أكان الريد جَنِيّة إت وحاتك جاني
أنَا وإنت والهبَّاني رُوُحْنَا تعانِي
قاضي الغرام فتح المَحَاضِر تاني
صَدَر الحُكُمْ تَأبِيْدَة للجيلاني
******
إسْتَأنَفْنَا قُلْنَا الريدة ماها جِنَايَة
لي اب كَفاً بِقَشْقِشْ دَمْعَة البَكَّايَة
عٌمْدَة دار جَعَل مُقْنَعْ بَنَاتْ التَّايَة
مَا بْيَاخُد حُكُمْ عَاشْقً الخُدُودُو مِرَايَة
============
وتشارك دكتورة نهى بالأبيات التالية
حقيقة أعجز عن التعبير عن جمال ما قرأت
أتاري الغرام شاوي الخلق بي شيو
شلح براق السنون غلب البروق بي ضيو
يا قاضينا قبل شوف الغرام شن سيو
طبع النافرة عزنا مكوي بي نار كيو
*****
يا قاضي الغرام وين قضيتك ماشة
مهيرة صابت الجيلاني بي سهام رماشا
خلت عقلو سارح بي العقل الرزين و بشاشة
كتل جيلاني من مدافع الغرام و رزاز رشاشا
******
يا قاضي الغرام الهباني جابوه دارو الفزعة
أتاريه ممكون راجي البقيف في الوجعة
قال إن بقيت درت لعقلي الرزين الرجعة
دعيت المولى من نيران الجاهلة ألقى الهجعة
******
يا قاضي الغرام الغي إن بقيت ما صابك
بتحكم بالظلم و أخير تقفلو بابك
الغرام يا القاضي لا برجع و لا هو بهابك
يومو اليصيب لا سجناً بحل لا قطع رقابك
===================
ويعود الهباني طالباَ الشورة من عزنا
وينك عزنا الباسطه العطايه كفوفـو
غبنا عليك وتابعنا الزمان وصروفـو
ابعرضين صِبح هايج ورافع شوفـو
طارى مراقد الريـل الملبـك دوفـو
***
شد وارجانى فى دونكى السَرح قِدام
عندى معاكَ شوره وسدرى فيهو كلام
الظبيه الغفيره بحوم سُقـد مـا نـام
ناوى عليها أسد النافذه شيخنا أبشـام
***
بدور رأياً عديل زى القطر مـا لفـه
بكره بجيكه بى اب باعاً ينفض السفه
عارفك ما بتلوج فى ظُلمى ما بتنصفه
يا أبسيفاً بجز ساعـة الغنايـم عَفـه
================
ولما لم يرد عليه عزنا ، بعد اسبوع كامل كتب اليه قائلا
وينك عزنا وساسنا المتين خَرَصَانـه؟
وينك يا سليل عربـاً سكونـه بُطانـه
جليس أمات وضيباً جارى لى سيقانـه
عَـرِج رُد علـى بالله مـا تنسـانـه
***
مزكوم بى غرام جاهله وسمح ميسانـه
بى جيهة الشمال تـالا القلـب نيشانـه
اللهج المَحَدَق وأحـلا مـن روزانـه
حير مسمع العجمى الكلامـو رُطانـه
***
مِقَـدِم دعـوه ليكـم جُملـة النافـذاب
تجونى زياره فى دار سيـد الأقطـاب
أفرح بى مجيكم وأرقُـص التـرراب
اكحِل عينى بى شوفتكم أرجِـع شـاب
***
أفاخِر بيكم أتباهـا وأقـول مَضيـوف
معايه رجال بتملاء العين قَدُر ما تشوف
معايه أسـود عرينـاً تنقـذ الملهـوف
بِدَفَعَو لى أب سِنام وبَمَنِحُو المَكلـوف
***
رجالاً ما بتتُر ساعة المحاص والزنقـه
تلت الليل بشدو بقومـو بِعَنُـو الفَنَقَـه
بِرَضو أمات لهيجاً احلا مـن المنقـه
محل قعدة عشاهن نازى سَمِـن اتسقـه
============
ويعود جيلاني كالبا من الهباني ان يعي منه الدرس القديم
الليل بوبه يا مهيـره الـدروب انسـدت
والفرسان خلاس ركبوا الخيول اتحـدت
بي ساعة الصفر حرب البسوس الجـدت
سواح بٍِترمي شوقـي الدقايقـه اتعـدت
--
ما تلوميني لو جبت الرجال فـي مـراح
والمسـدار كمـان مـادام تبـع سـواح
يا ست الجمال انـا قلبـي ليـك مرتـاح
لكـن الحـرب مــا بتعـتـق الارواح
--
شهرين في نهيض بي قجـة اب قـران
في دربك بكاتـل فـي الانـس والجـان
لو ما قلبي يبـرد فـي حـداك فرحـان
ضـرب الدكاكـر ذي زمـن حـسـان
--
سواح من زمان علمتـه قلتـه حـواري
زمن عسوله كان بركب معاي وجـاري
وكت عرف السيوف مسك الرسن قنجاري
قال بخرت مهيره عشـان يولـع نـاري
--
قدار يـا زمـن فيـك العجايـب شتـه
وفيك طرق اب حجل من الشـدر اتحتـه
فـارس دار جعـل الاصلـه مـا بنتـه
كتر في مديـح سـواح وسـوه محطـه
--
الفرسان زمان يا مهيـره كانـوا كتـار
كـان الميرفابـي البـركـب الـدفـار
كـان اب درق ياكـل ويشـرب حــار
دا الحين براي واقـف وسيفـي شـرار
--
المسدار اكيـد شايـف الشـراد قدامـه
المزروب بـلاده وشعـره فيهـا لجامـه
لو ما مدح سواح بالصح عجبني كلامـه
في ضرب الحساب يا مهيره خلي ملامـه
--
بشوف بشار خلاس خلا البطانـه وناسـه
كمان خلا الحرب سيفـه المعتـق قاسـه
عامل لي شهريار ما فطـه مليـة كاسـه
برجع ليك شهـرزاد واعدمـه الوناسـه
==========================
ويظهر عزنا بعد الغياب ليوجه الحديث الى الهباني
حباب هباني قيدومنا المعبَّى زنادو
كريم أجواد مأصّل من قديم تيلادو
ود عز الرجال بيت النظارة قصادو
نفداك بالدموم وارواحنا ليك انقادو
******
مهيرة الفارس الموزونة غارزة سهامة
في شيخ العرب نزلت قبيل احكامة
شداهو اب سدر قاصد يزور ام شامة
ما بفك الرسن كان ما قبض في لجامة
******
بدورك لي نسيب بديك ضي عينينا
ست لهجاً محدّق سمحة راسية رزينة
درعاةً تجود بي بسمة صافية وزينة
أنساها ام شلخ والباقي كلو علينا
******
بدور أوصف واقول في الجاهلة قولاً تام
ست جيداً محذّق وللقلوب كزّام
مهدّل ديسها رامي مع الكتيف قدام
حلوة عيونها فارة سنونها خاتية ملام
******
مع النافذاب سكونها هناك يا هباني
ريلاً طبعو نافر كان عنيتو ثواني
تسجع في النضم وتشيل ترددو تاني
وكان فاز القلب بشكير غرامها تهاني
******
نسوي الخطبة يوم اتنين بجوا الهمباتة
شادين الابل فارشين عليها سباتة
يتقدم كبيرنا وشيخ عموم نافذاته
يعقد للأصم يديهو (ريمنا) حلاتة
====================
ومشاركة من ابو السرة يحكي فيها شوقه للنافذة وأهلها
النافذة ام سماح الليلة جيتك تاني
متقريف خلاس قهوة لقاك رامياني
مشتاق لي ملاقاة عزنا وهباني
وعقبا الاقي مهيرة جنب جيلاني
==================
وتدخل لمهيرة لترد على جيلاني بقولها
مرسول البريد الكاتبو يـــا جيلانـــــي
سببه الارضحال المن زمان ودانــــــي
لقاضي الغرام اشكيك وللهبانـــــــــي
من نار العشق الموقده في الوجدانـي
وظنيتك نسيت مو كنت انت الجانــــــي؟
بتتحنس كمــان ارجـع واجيلـك تانــــــي
اكـــان داير رضاي ورجوعـي والتحنانـي
فارق سيده والعسوله وفي جواك انا تلقاني
======================
وترد أيضا على ابو السرة الذي ذكرها في مشاركته
حبابك يا الحبيب قهوتنا عامره بجودك
وشرفتا الديار زايدنا ديمه وجـــــودك
وجيدن لينا جيت حافظين مكانو حدودك
وللنافذه ام سماح يا الوافي انت عهودك
=======================
ويختم ابو السرة هذا الخيط برد على مهيرة
المهرة ام رشيم يالحاقة دايما شكري
يا ام بنا عبق قريفني شلهت فكري
الهمباتة جوك بطحاني جعلي وشكري
كايسين في حداك فنجان غناك البكري
Subscribe to:
Post Comments (Atom)
No comments:
Post a Comment