جلسة الهمباتة في دار جيلاني يوم الجمعه 18 مايو2006
صـدق الحلـم واتجمـعـوا الأنــوار
وشق النيل كردفان واتعانقوا الاشجـار
المزروب زغرتت الزام رسـن مسـدار
وموكب باره راكب ابقره شيـخ بشـار
--
بو ذر جانا داخل النافـذه فاتـح بـاب
مسادير قلبه فاضـدت بالعسـل اكـواب
ترنم بيها في جلستنا شـوق اصحـاب
وفات القدرو حتي الكبرو في الاحقـاب
--
يوم الجمعه في دار زايد غشانـا النيـل
سالنا نفسنا وين يا عزه شعـره خليـل
متين يا عزه في غربتنـا سهـر الليـل
متين يا عـزه سابقنـا الابـل والخيـل
--
حيلك يا اب سدر جاك المنيـع اب قـره
جابلوا دعاش مطر مـن النوافـذ مـره
ودع سودري في رمالهـا توبـك جـره
جيب الشكره فوق لمهيره طلعـت بـره
--
وكت زايد نزل فـي كردفـان ورمالـه
جا المسدار رسم بي القافيه كُلُ جمالـه
حَيُوهُ الرجال بي سٍيوفهاَ فُوقْ وجمالـه
هَزا وقال اريٍتْ حـال الإمـارات حالـه
--
مسدار الغفيل جاد بي المعاني هطولـك
ذي مطر الخريف الشاربه منـه تعولـك
البت البتقـدل بيـن مراحـك وهولـك
ورتنـا يـا بـوذر مقـام فـي طولـك
--
اتوهطت فوق يا عصام بطانة اب سـن
متل طه الضرير فـوق الرسـن بتحـن
ود ضحويـه قدامـك سيوفـه تــرن
بالدجتل بيكتب ميلـو ام أس أنMSN
--
رزام نحاسكـم فـي القلـوب شــداد
شمايل اصل ابوك مـا بحسبـه العـداد
فيها مع السيوف خيرة الرجـال والـزاد
وفيها جمال بناتـن راسيـة كالاوتـاد
--
ود ابسن في ام هبج برد سهول سيدون
متابع الصيد يوصف في الجمالها عيون
كم حسان ابوك بي غرامه كان معيـون
نظم الغافية ذي قول ليلـه والمجنـون
--
يـا شهـرزاد ومهيـره كنتـوا معانـا
يوم قاد الرسن بشـار فجـر وغشانـا
لاقاهو ابسدر والـزام مـلان جبخانـه
لو سواح وصل في القعدة كان دا منانـا
--
يا المسدار خلاس ما شفتوا حالتي الفيها
بعد الشيب بدور طيب البخـور والجيـه
أدوني الغفيل بي عمري جيـت افديهـا
واكان قولتوا لا.. تبقى السيوف قاضيها
--
بتلاقوا الرجال في الشارقه قال مسـدار
مضارب سيفه من اجـداد شعلـة نـار
فقاه نوق علـي سكينـه ليـل ونهـار
مع مهيراتنا نحضر عرسـه يـا بشـار
============
ويرد عليه الشاعر المسدار بالابيات التالية
مرحبتين حـباب أهل الكرم والجــــــود
ومرحبين حباب الفعلهم محمـــــــــــود
الليل الطـــويــــــــــــــل بتهجدوه هجود
وفي الحر والبرد صُوَّم ركوع وسجود
***
المسدار
مرحبتين حبـــاب عرباً مطَرْهُم رشَّ
والزَّام من صعيد طاريلو ريحة قشَّ
في ربْعاً كبير لاقـيت وُجُـــــوهَاً بَشَّه
دا الجيلاني خوي راكزقفاك يا عشَّه
***
أبو ذر
حباب جيـلاني يا الشيخ للقبيله وفارس
ويا الأسـد النتر حامي القواب الحارس
كم للقيـمه في قلوب البريدوك غارس
وكم علمت في النافذه بتضيف وتدارس
***
المسدار
فرسان دار جعل وكتين سـلاحُم رزَّ
سادِّين المشــــارق والبطون منحزَّ
ما بعرفوا السَّــواتر حاشا زولا فزَّ
أبشِر (ياللَّسـد ) بيك الجـيوش تهتزَّ
***
أبو ذر
المسدار حـــــــــــــكالي وشوقتني حكايتو
أشوف أهل الشعر خبراء البعرفو روايتو
قلبي بهاتي يا الأخـــــــوان مرادو وغايتو
كان يقدر يجيب حــــــــدَّ الشكر لي نهايتو
***
المسدار
يا بشَّار أخــــــــوي جايِّ ومعاي اللمَّه
راكبين الوَعَرْ ونفـوســنا عاليه الهِمَّه
في الحوش الكبير دايرين نسوِّي النمَّه
ناس جعل العـزاز خلوا الخلوق مُنجمَّه
***
أبو ذر
تحركنا العصير والشَّـــم تميل للغيبه
وشادِّين فــوق عنانيفاً مصفى خبيبه
قالو خـبرنا مبسوس في إذاعة ريبه
كم مسدار طبع منشور على توشيبا
***
المسدار
من شمساً عصير واليوم خلاص كان مسَّ
والشــــــــــــــــــوق الكتير بيناتنا ما بندسَّ
في طارْفة حديث جيـــــلاني قال وين هسّه
ردَّالو البِشــــــــــــــــــــاري الّلْمداين جَسَّه
***
أبو ذر
زرنا الشلَّه والمحريه فيــهم طيبه
قالدناهم الهمـــــــباته رمز الهيبه
إتغدينا شـــــــيَّه وكِبده بي دَفَــريبا
تبْ حَلّينا مــــــــا خلّينا مِن ترطيبه
***
المسدار
إتلقونا العَـــــــرَبْ فوق المرابع برَّه
والزَّام من بعيد شايفنُّو كاسع الجِرَّه
حفَّاظْ للعهود مــــــاهو القعود العِرَّه
جابولو العلـــــوق حاشاهو ما بنترَّه
***
المسدار
جابولنا القــــــــــــداحه وشيَّةً مجمُوره
وامْ دَفْـــــــــــــرَبْ تَنِزْ والله يوت بِنْدُورا
(والشكري) الكريم بيناتنا عزَّ حضُورَه
ســــنارك ضِحِك قالْ ماني زول بَنَدُورا
***
أبو ذر
للهمباته جمــــله بَرُص بزِفو ســـلامي
وشوق بي شِدَّه بي كمَّاً مَهُول وهـلامي
مين الغيرْكُم الهمباته بخشى مــــلامي
تفصيلْ قولي فيكُم كُلْ غناي وكـــلامي
****
المسدار
من دار عطبره جـــــــــانا السِّلاحو بدوِّي
فرتاق الصفوف الحِسْ رصاصو بعـــوِّي
مُتْرافِق مَعَاكَ يا (حسين ) أخُوي مُتْقَوِّي
أبشِر يا (عصــــام ) يوم اللهيب بتكـوِّي
***
المسدار
من نوَّخْنا جيــنا لحِّد ما شـــــــــــــــــدّينا
جيـــلاني اللَّســــــــــد واقف دوام بَغْرِينا
(والشُّكري) اللَّزُوم معروفه فيك شُكْرِينا
(والبطْحَاني ) خُــــوي فوق الكرم حَادِينا
***
أبو ذر
شيخ جيـــــــلاني قام عرَّفنا بي أولادو
سـنارك بريـــــــــــد النافذه من ميلادو
بشَّار البشــــــــــوش بشَّر موفر زادو
ودْ ابسِن هناك حارساهو من أجدادو
***
المسدار
من حوشاً كبير برسل سلام لي مهيره
من ناسِي الرَّفق متوشحنو زخـــــيره
بنقولِك مُرادنا نجيكي زامْـــله مسيره
يا البيتِك شُقَــاق متْمَنِّي فيهو ضَريره
***
المسدار
ومليون السَّــــــــــلام لي خيَّتي الوطنيَّه
بت عِزَّ الرجـــــــــــال الما بسوَّوا النيَّه
بطحانيَّه ديلْ باكلو الزَّخـــــــــيره الحيَّه
وفي الجود والكرم حايزين مكانه عَلِيَّه
***
أبو ذر
يا المسدار كلامي الفيك بدورلو إجاده
ود صُلاَّح سليــــــل خُلَّص أهل سجَّاده
أجــدادك قبيل نُسَّاك جباه هجَّــــــــاده
خيَّطُو الشَّرفْ عقبان برمْتُو نجـــــاده
***
المسدار
يا بو ذر خــــوي إتَّ الشَّرف حايزنُّو
مـن تبيت صغير إتَّ الكتاب حافظنُّو
عزَّيت البلد من خـــــــيرك الدَّاخرنُّو
بالشعر الرصين إتَّ الجَمــال فايتِنُّو
***
المسدار
أبوك ودَّ المـــراد الخيرْ مكمَّن فيهو
شرَّاد للجُنون وصلاحو مو طاريهو
كم عالَجْ مِشوطْناً فارِّي في واديهو
أدّاَك القيــــــم وإتَّ الشَّرف عاليهو
***
المسدار
من خلوة مسيد جدي البضوِّي ظلامي
بالصِّدْق الأكيـد يا خويْ بقولو كلامي
صالح ود صلاح بو ذرْ رفعتو مقـامي
ليك آلاف سـلام لالوبه تحكي هُيَامي
***
أبو ذر
كيف يا مهيره أهلك باختــــــلاف ألوانُم
أولاد عِزَّه شــــــــالوك في حَدَق أجفانُم
صدو الإحتـــــــلال جيش أبْرِدا وأعوانُم
قاطعين راس كبيرُم وسلمُوهو اكفـانُم
***
المسدار
سلام نافذتنا هوي أهل العيون الحمره
ناس عزه وكرم واطين عليـها الجمره
من حرَّ الهجير ماخدين رجاله وسُمْره
وكان نَخّيتُو تبْ جيـــلاني عندو العَمْره
***
المسدار
بعد أكرمنا تبْ جيـــــــلاني فات بي غادي
قال لِي أخوي بشوفك من زمن مو هادي
خبَرَك داكَ جـــــــانا وزاعو فوق الرَّادي
أبقى على العــرس يا الفيكْ قيمْ أجدادي
***
المسدار
قلتَلُو يا جيلاني خوي جدَّدت لي سُهادي
والقلب الشَّفيف الليــله عــــاد موعادي
من كنتَ الرَّعَدْ طُرقــاعْتي تُرْعِبْ وادي
سلَّمْت القليب واصبحتَ بي أســـــيادي
Friday, March 27, 2009
Subscribe to:
Post Comments (Atom)
No comments:
Post a Comment