يا مارقة من جوف الزمن
--------------------------------------------------------------------------------
يا مارقة من جوف الزمن
يا ساكنة بي عصب السكون
مشدوهه بيك كل الحروف
حتى الكلام محتار وقف
واحتار معاي صمتي الحنون
وفرحتى بيك صوتي وانا
وفرحت تقاسيمي البقت
تتباها بيك وسط الشجون
شوفي البحر مدى اليدين
اتفرهد احساسو الخدر
والشوق يساسق في العيون
والنجمة لفاها الفرح
رويانة بيك حد الكفاف
مسكونة بيك حد الجنون
مبسوطة بيك ايدي البقت
تتحسس الشوق في ا يديك
نشوانا بيك مد المجون
يا داخلة بي كل المدن
داخلك انا وبتشابا ليك
اتشابي لي جواي معاك
وان كان بطاوعني السفر
برجاكي في كل الدروب
ودروبي بتسافر وراك
والسكة تنكر من وراي
سفر المواعيد الضجر
وتحندك الغيم في سماك
واتباهى بيك نفسي وانا
وشوق العصافير الهطول
الجايا تحلم بي صفاك
وقتين يصافيكي العشم
وانا في دروب الغربة ليل
مشتاق يفتش ضي بهاك
يا ضي مشاعري سماكي وين؟
مشغولة بيك كل الحواس
وانا شكلي ضايع في رجاك
يا مارقة بي قبل الوصول
وحنينة زي وجع الفصول
انا في رجاك اندسي بس
مفتوحة ليك كل المسام
اختاري من وين تدخلي
واتلاشي في عصب النفس
اتماشي بي.. وسط العروق
بتماشي بيك جواي انا
ان جيتي بي اخر نفس
يا شادة بي ليل الولف
انا في رجاك صوتي انكسر
شوفيهو جواي انحبس
حتى الصبر قاعد معاي
اتوهط الجوف السهر
حاضن عويناتي وجرس
لا لاقي سكة تطول مداك
لاموجة تحضن ضفتيك
او حتى فيبك اندسى دس
وريني يا وجعي القديم
اتوهطك بالله كيف؟
لو مرة بس عطرك همس؟
عبدالله وداعه الامين
لندن 01.07.2005
=============
http://www.al-nafitha.com/vb/showthread.php?t=363
Subscribe to:
Post Comments (Atom)
No comments:
Post a Comment