الزبير باشا - 21- مواصلة الحلقة .. نمشات في خدود الجكس (2)

مواصلة الحلقة .. نمشات في خدود الجكس (2) ـــ

--------------------------------------------------------------------------------
الزبير: واصل يا خالي الذهن:
الكلاكلة: قال ليك لبناني .. وواحد ود عماً لينا .. .. حريمهم ضايعات منهم في معرض الخرطوم الدولي .. ود عمنا سأل اللبناني .. مرتك لابسة شنو ؟ قال ليهو بنضلون جينز ضيق .. وبلوزة قصيرة .. قام اللبناني سأل ود عمنا : وشو لابسة مراتك؟ .. ود عمنا قال ليهو مرتي إن شاء الله ما تتلقي .. أرح نفتش مرتك


الزبير: معانا مكالمة؟
ألو .. ألو .. أهلا مرحبا .. معانا منو؟
إنتا معانا علي الهواء .. إتفضل
علي الهواء .. ولا فوق راكوبة في عين الشمش ما شغلتي.. الواحد فيكم من ما نتصل طوالي يسبل (طرفو) ويكسر حسيسو .. ويدي كرفتتو المتل رسن الجمل دي جبدا .. ويقول لينا إنتا معانا علي الهواء .. أريتك بي هبوب شهر خمسة الما تخليك تشوف راس نخرتك.
أسمع هوي يالزبير .. تلحق لمن تقطع الخط دا .. ولا تقاطعني قبل ما أتم حديثي .. علي الطلاق أجيك .. ونتداوس كدي .. زي الأسدين الإتشاكلو .. ونم . نم .. كلو واحد يقرم من التاني حتة .. وفي الآخر ما فضلوا في بعض الإ العضام.
أريتكم بالبازنقر اليعدموكم نفاخ النار .. إنتا والمعاك جت .. ورمتو فشفاشنا

الزبير: إتفضل يا أخي .. برنامجنا أصلا الهدف منو .. الرأي .. والرأي الأخر
أيا .. قول كدي .. عشان عرفتني لابـِد لك فوق راي... أمشي يا مسخوت

أولا بالتبادي معاك أخوك الخمجان ود ست أبوها .. وست أبوها دي للمعلومية هي أمي .. لكن في زمنكم دا توزن 300 راجل وثلاثة شّــفع .. وبتين ..
تانيا بالمتني : قبُـل نحن الحروم ديل الواحدة ما بنشوفا طب .. عـِلا يوم الدخلة
فهمتا حديثي .. والدخلة زاتا كانت في بطن البيت .. خلي هسة بقو يمشو الي الفُـندك .. وأنا معرس بت (عمي) بقولولا الرتينة
وكيلك الله كضب ساكت .. الناعمني يوم الدخلة جيت لقيتا شن بتشبه بلا أم نويويرة ومشلخة جنس شلوخاً .. سعيلي الله أنا كنتا قايل تاكلين سلم الهيئة المركزية بتاع ناس الكهرباء فوق جضوما

اها نحنا غشونا ناس سرور .. وكرومة .. والخليل
وزنقار... أريتو أخوهو أكان كتلو.. الجنى البنوتي .. دا.

يسوولينا في
شفتا في الأحلام ظبا يتهادن .. بي رخيم نغمات خلي تنادن
حنئذٍ ظنيتو كان قاصد: شفتا في الأحلام (ضباع) يتهادن
فهمتي حديثي ..
يعني كان في تضليل ... وأكبر عملية خداع عاطفية في التاريخ وكونو مثلا هسع دي نفس التضليل دا بقي يمارسوا الشي البقولو ليهو (مقدر الظروف) دا
أولا: يبيع ليهن البهارات .. ويبرُطن وشيهن .. تلقي الوشيش أبياااااااااااض .. وباقي الجسم أسوااااااااااااد
حتي قالوا ناس إتحاد المرأة كان عندهم حملة تعبئة .. وجاي الرئيس يناضِمن
أها قالوا دخلتو القاعة كدي .. الحروم إترصن ووقفن .. الريس عفيت منو الساعة الدقة التربيزة بي عصايتو مرتين .. وقال ليهن .. أسمعن يا حروم هوي .. البارطة كلها ترجع وراء ..

تانيا: مقدر الظروف دا بقي يأجر ليهن الأرداف .. ووحدات تانيات بيأجر ليهن الصدر

بوكو: في الحقيقة ..
الزبير .. نعم وكيل عريف/ عايز تقول حاجة؟
بوكو/ أيوا .. مرة كان جات عندنا واحدة عاملة زي عمود السلك كدا .. فتحت بلاغ في شباب قاعدين في الدكان الناصية ال جنبهم قالت كلو ما تجي ماشا يقولو ليها
Tube less
طوالي فتحنا ضدهم بلاغ (المادة 11) من قانون البنشرجي التعدي علي أنابيب الغيرطبعاً .. جبناهم عندنا في القسم .. وجبنا الكمبرسون .. والمعني واضح.

الزبير .. نعم .. نعم .. واضح بالحيل
بقولو .. أديهو موية .. تديك طراوة .. لكن الظاهر عليكم بتستخدموا غاز الفريون.

الزبير باشا: الدكتور / سارة .. شايف إبتسمتي .. وزي عندك مداخلة وكدا
إتفضلي.. هل من تعقيب؟
Yah
أولا عايزة اقول إنو
Nice topic\
تانيا زي ما عارفين انو الشباب كانو بمشو الجنوب عشان يعملوا
Die hard
لانهم عايز يتزوجوا الحوريات .. ونتج عن ذلك طبعا كمية كبيرة من البايركس .. ورجال النسوان .. الله يكفيهم شر الفياجرا .. بقو يعرسوا في البنات الصغار .. والواحد فيهم الليلة دخلتو .. وبكرة كسر تربتو .. وكان طوّل خالص .. رجعتو من شهر العسل يكون عندو حجز مؤكد للرفيق الأعلي .. وطبعا دا بساهم بشكل مباشر في زيادة نسبة الأرامل .. الـ بقن أكتر من عدد حبات الرمل.

وعايزة أوضح أنو نحنا ما بنميل لعمليات التجميل .. والكتيرة خاصة .. لأنك عندك رّبــع الراجل الإسمو مايكل جاكسون دا .. هسة من كترة عمليات التجميل في وشو بقت
(أرنبة نخرتو)
تقع .. وهسة ملصقة بي صّــباع أمير ..
في الحالة دي .. الجكس والبايركس .. بما فيهم الأرامل .. لا زم يعملو
New look
عشان تجتذب الشاب
يعني بعبارة أخري
OUT LOOK EXPRESS
وكدا
وحتي راجل المرا
وال
New look
يتطلت
External support built
والحكاية دي أثبتت فعالية .. حتي علي مستوي صحة الفتاة ..
أنا شخصيا بعرف واحدة كانت إستأجرت أرداف ماشة بيهم حفلة .. فجأة جاتا ملاريا خبيثة .. ومتحوصلة في الكبد .. نقلوها بالإسعاف مغمي عليها للمستشفي .. هل تصدقوا بأنو البت دي أخدت خمسة حقن زيتية في الأرداف الصناعية دي .. هسة دي السنة الثالثة ما جاتا الملاريا قط؟

وكيل عريف بوكو .. عندي (مداخلة) بسيطية .. طبعا مع إبتسامة مقاس
( سبعة في ستة)
يقول:
مصداقاً لي كلام الدكتورة/سارة
إتذكر كنت سايق لي زوجين للمحكمة في قضية بتاعة طلاق .. والمحكمة حكمت للأب بالشافع ... وكان عمرو شهرين ..
أها الولد دا .. جابو ليهم المرضعة .. ابي يرضع .. ومد ليهم لسانو
جابو ليهو : حليب كاني .. سيريلاك .. لبن بقر ... برضو مدا ليهم لسانو وقال ليهم كان جا القاضي زاتو .. ومعاهو وكيل النيابة .. برضو ما برضع
واحدة من عماتو حاولت ترضعو .. برضو مدا ليها لسانو.. حتي قامت زعلت وقالت لي أخوها أنا تاني بيتك دا ما بدخلو .. إلا لـ شي يدخل الناس كلهم

المهم .. الشافع عندو عمتو الصغيرة دي تفتيحة .. مشت أجّرت صدر صناعي من مقدر الظروف.. كامل الدسم ... الشافع دا رضعتين .. التالثة مشي .. حتي من غير ما يحبي.. أيّ يمين

الزبير: جميل .. عظيم .. يجو يقولوا ليك .. خير غذاء للطفل .. هو لبن أمه
لبن أمو دا كان ما إنكرش في الواطة دي زي سلك العدة في صاج اللحمة المحمّرة بيقدر يمشي من غير ما يحبي؟

أعتقد معانا محادثة
ألو .. ألو مرحبا..
إيهي .. إيهي .. هي؟ .. ممكن أشاطر؟
إتفضلي .. انتي علي الهواء
تعال يا خوي .. انتا شابكنا علي الهواء .. علي الهواء
الهواء عند الله .. والخضار في السوق .. الهوّة .. الزبير؟ .. إنتا خليت تلفزيون البالتوك .. جيت تكرهنا هنا في
(تلفزيون ود عثمان)
مخير الله يا بنات أمي .. القسمة ما بتتعادي
الزبير .. إتفضلي .. يا أخت .. ولا بعمل ليك باونس .. أقصد .. ولا بدي الفرصة لي زول غيرك.

اولا حاجة الشيء البخلي الشباب يعزفوا عن الزواج أهو لمن يلاقو واحدة زي اللديحة التنيحة الكريهة دي .. ال قاعدة تتلقي مننا المكالمات لمن نضرب ليكم...
الزبير: يا أخت لو سمحتي من غير تجريح.. لو سمحتي ..
تجريح؟ .. أسكت إنتا شفتا جروح .. يا بتاع البرايفت .. والأندركفر.
إتفضلي يا أخت لو سمحتي..
أسمع يالزبير .. كان حدثوك النحدثك .. وكان ما فهموك .. النفهمك .. أنا بشرية دي .. مرت أبشر ود البشير ..
إنتا والقاعدين معاك ديل ما ناقشين أي حاجة .. وما جايبين خبر .. . وزير التربية والتعليم .. قاعد ما جايب خبر ... وزير التعليم العالي .. ما جايب خبر .. الأهل نايمين ما جايبين خبر ...
والشاويش الطيرة القاعد معاكم دا .. وجماعتو .. ما جايبين خبر.. هم فاضين لي من ملاحقة ستات الشاي ..

(الزبير باشا: هي هيء هيء)
يأ أخت لو سمحتي أنا ما بسمح ليك تفحمي الشاويش أركان حرب دا بمثل هذه العبارات .. ولا أنا حأضطر أقطع المكالمة
(كشكرة ساكت طبعا .. كان لاقي طريقة بهدي ليها قمر صناعي).

بشرية: هي .. أريتك بالغباء .. يالغبيان .. يا المغيب .. أنا بتكلم معاك من (الثريا) كان ما نهيت المكالمة دي بي مزاجي إلا تطفو الكبانيات حقات سوداتل كلهم .. وكان ولعتوهم .. تلقاني قاعدة ليك في حلقك .. جنب لسان المزمار.

الزبير: طيب يا أخت .. خشي في الموضوع
بالحيل .. بخش .. تدخل عليك السنة الكبيسة .. كنتا بقول في شنو ..أها الدنيا كلها غايبة ومغيبة زيك كدي.. والبنات كلو واحدة مفنوسة ليها بي موبايل .. تتكلم مع واحد ... وحبني وأحبك .. وحبني وأحبك .. وما دايرة أكلمك عن نوع الرسايل البرسلوها لي بعض...
ياعالم .. الطلاب ديل في الجامعات ظهر عندهم الزواج العرفي
يعني زواج من غير التزامات.. إلا الالتزامات الإنتا عارف ديك
وكان ما عارف كلمني هسع دي بوريك ليها.
الزبير: لا .. لا واضح .. واضح .. الفكرة واضحة
(تجر واطي يا كبير)
أها .. البخلي الشباب ديل يتزوجو بي وش الدرب شنو
الزبير: شكرا ليك يا أخت..
رسالتك وصلت .. يعني الشاب .. بدل ماجي بي قولة .. خير .. وشبكة .. وشيلة بقي يجي .. بي مجهودوا بس .. كلام زي البلبطي ..

نواصل .. في الحلقة (3) ــ


----------------
06-08-2005,

http://www.al-nafitha.com/vb/showthread.php?t=332